Minf F**ked 6

 CHAPTER 5

Academics, Career aur Professional Life Mein Overthinking

Career humari zindagi ka woh hissa hota hai, jiski tension humein kaafi kam umr se hi hone lagti hai. Pandrah-solah saal ki umr se hi jab hum Class 9 aur Class 10 ki ore badh rahe hote hain, humare dimaag mein ek nahi hazaaron sawaal aane lagte hain ki aakhir aage kya hoga? Bahut se students bachpan mein hi apna career decide kar lete hain ki bade ho kar hum doctor, engineer, businessperson jaisa kuch banenge.

Jaise-jaise woh classes mein aage badhte hain, kuch students ko samajh aata hai ki unka kis subject mein interest hai, toh unhein clear ho jaata hai ki unhein aagey kaise kya karna hai. Lekin bahut se students aise bhi hote hain, jinhein kaafi umr tak samajh nahi aata ki aakhir aage chalke woh kya karenge, kis field mein jayenge, kis kaam ko karna pasand hai unhein. Woh khud ke talent ko, khud ke interest ko khoj hi nahi paatey aur overthinking karne lagte hain.

Overthinking sirf career choose karne ko lekar nahi hoti, school life mein marks ko lekar bahut zyada tension hoti hai students ko aur sirf marks ko lekar hi nahi, sabse aage nikalne ki bhi tension hoti hai. Second na aa jayein isko lekar bhi tension hoti hai aur fail ho jaane ki bhi tension hoti hai.

Tenth tak aate-aate bahut students ko yeh clear nahi hota ki woh aage kaunsa stream choose karenge. Commerce mein interested students Commerce lete hain; Science jinhein leni hoti hai, woh uss ore badhte hain, aur Arts mein interested students wohi stream choose karte hain. Lekin kayi baar aisa bhi hota hai ki Science ki ichcha rakhne wale student ko Commerce mein jaana pad jaata hai aur woh bahut confuse ho jaata hai ki jo usne bachpan se socha tha ya jo banne ka sapna dekha tha, woh ab us field mein ja hi nahi payega, aur bahut overthinking karna start kar deta hai.

Jaise-taise 10th aur12th clear ho jaane ke baad college mein admission ki tension, college kaunsa mil raha hai aur kaunsa nahi uski tension, college kaise jaana hai kaise nahi uski tension. College mein admission ke baad kayi cheezon, zimmedariyon se ghir jaate hain students aur tension ka toh jaise bawandar hi aa jaata hai zindagi mein.

College jaise-taise nikal jaata hai aur phir tension aati hai job ki, ya business ki, ya kisi start-up ki, aur woh point hota hai jispe saari zindagi tiki hoti hai. Shuruwaat is tension ki 10th se ho jaati hai, aur chalte-chalte college ke aakhiri din tak aa jaati hai, fir job ki talaash, usme grow karne ki tension, job nahi toh business aur usse judi hazaar pareshaaniyan. Kuch logon ki khwaish hoti hai apna kuch shuru karne ki toh uski bhi tension rehti hai, kya karenge, kaise karenge.

Kul-milake career humari zindagi ka woh part hota hai, jo humare liye sabse zyada zaroori hota hai aur isliye humein uski tension bhi bahut hoti hai. Toh hum aage career se jude aise kayi saare aspects ki baat karenge, jinke baare mein hum kaafi zyada overthinking karte hain, pareshan hote hain, bahut si baar depressed bhi ho jaate hain, aur kuch log suicide jaise raaste ke baare mein bhi sochne lagte hain.

Shuruwaat hum karenge jab hum 10th mein aate hain, kyunki sirf padhai hi nahi, balki zindagi ka asli imtehaan humara 10th se shuru hota hai, jahan se humare upar pressure padna shuru ho jaata hai sabse zyada marks ka.

Class 10 se Judi Kuch Baatein

Jab hum 10th mein aate hain toh humare upar pressure hota hai aage ki stream lene ka. Generally teen streams hi hoti hain—Science, Commerce aur Arts. Bahut se students ko yeh sikhaya jaata hai ki Science woh lete hain jo sabse zyada hoshiyaar hote hain, Commerce woh lete hain jo padhai mein average hote hain, aur Arts woh lete hain, jinka padhai mein koi interest nahi hota.

Yeh sabse bada jhooth hai. Agar aapne socha hai ki aapko aage science field mein jaana hai, aapka science ke subjects mein mann lagta hai, aapka interest aata hai science padhne mein toh science ke liye prepare karo. Agar aapka mann science mein nahi lagta, na aap se maths achhe se hoti hai, na physics samajh aati hai, aur na hi chemistry ya biology, toh aap Commerce ya Arts mein se kuch bhi le sakte hain.

Kisi ke pressure mein aa kar ya doosre kya le rahe hain woh dekh kar apni stream decide mat karo. Is samay hum apne doston ko bahut follow karte hain, jis stream mein humare dost ja rahe hote hain hum bhi usi stream ko lena prefer karte hain. Ya koi khaas, jiske saath hum waqt bitana chahte hain classroom mein, uske chakkar mein hum le toh lete hain stream, par aage chal ke hum bahut zyada problems face karte hain. Isiliye kabhi bhi doosron ko dekh kar stream choose mat karo. Apni capabilities, apne interest ke basis par stream select karo. Kyunki iske baad jo bhi padhai hogi agle paanch-saat saal tak woh aapke decision par hi based hogi.

Agar zyada time beet gaya hai toh aap switch nahi kar paoge apni streams or subjects. Isliye jo bhi stream lena, soch-samajh kar lena; jo subjects lena, soch-samajh kar lena. Bhale hi uske liye apne doston ke saath se compromise karna pade ya apne favourite teachers se compromise karna pade, lekin jo bhi stream lena, soch-samajh kar hi lena.

Agar confused ho ki kaunsi stream lu toh iska seedha- saada jawaab hai, jis field ya subject mein aapka interest hai. Koi kitna bhi kahe ki woh stream achhe students nahi lete ya uska koi future nahi hai, aisa kuch bhi nahi hai, har stream ka future hota hai. Aapka future aapki streams nahi, aapki knowledge, aapke andar ki art, aapka interest, aapka dedication us kaam ko karne ka, yeh sab decide karte hain.

Kayi baar parents ka pressure hota hai, kayi baar relatives ka pressure hota hai, kayi baar kisi aur ka pressure hota hai aur hum us pressure mein galat decision lete hain. Har student ki apni capabilities hoti hai, na hi har student class mein first aa sakta hai aur na hi fail ho sakta hai. Apne aapko waqt do decision lene ka, apne badon se discuss karo ki unka kya opinion hai aur aap career counselling bhi kar sakte hain, jissey aapko ek better overview mil jayega ki aapko aage kya karna chahiye aur kya nahi.

Lekin, overthink karne ki zarurat nahi hai. Dekho, har problem ka koi na koi solution nikal hi aata hai. Is problem ka solution samne hi hai, bas usey pehchaanne ki aur usko implement karne ki der hai. Jaise hi ho jayega, aapko samajh aa jayega ki aapko aage kya karna hai. Samajh sakta hu ki yeh waqt bahut keemti hota hai aur kaafi kuch depend karta hai iss par, jaise ki aapka future aur aapka career. Lekin yakeen manna, raaste apne aap khulte chale jaate hain, bas aapko khud par vishwaas hona chahiye.

Class 12 se Judi Kuch Baatein

Class10 se aage badhte hain, fir Class 11 mein aate hain. Eleventh clear hone ke baad aati hai humari school life ki sabse aakhiri class, 12th. Yakeenan, Class 12 ek aisi class hoti hai jo itni jaldi khatam ho jaati hai ki hum soch bhi nahi paate. Har class shuru hoti hai aur pure saal tak chalti hai, lekin class 12 jab shuru hoti hai toh humein waqt ka zara bhi andaaza nahi hota.

Padhai ki tension, future ki tension, friendships, relationships, farewell … itne sab kuch se hum ghir chuke hote hain ki humein ehsaas hi nahi hota ki kab yeh class nikal gayi aur kab yeh saal guzar gaya.

Beshaq Class 12 yaadon ka pura dariya hota hai jisme aaj tak ki saari classes mil jaati hain jaise nadiyan samandar mein mil jaati hain. Khushiyan toh bahut judi hoti hain isme par gum bhi hazaar hote hain. Yeh aakhiri saal hota hai, jahan ek hi chhat ke neeche saare ke saare dost rehte hain, padhte hain, masti karte hain, shaitaaniyan karte hain, aur laakhon-croron yaadein banate hain.

Lekin sirf achhi-buri yaadein hi nahi, yeh class bahut tension bhi lekar aati hai zindagi mein. Jo students padhai mein achhe hote hain, unhein sabse aage aane ki tension hoti hai. Jo average students hote hain, unhein achha score karne ki tension hoti hai, aur jo padhai mein kamzor hote hain, unhein pass hone ki tension hoti hai.

Har dimaag pareshan hota hai, pressure cooker ki tarah dimaag ki seeti baj rahi hoti hai. Itna competition, itni tough padhai, aur har student yahi soch raha hota hai ki jo woh chahta hai, jis cheez ki tayaari karna chahta hai, woh clear ho jaye aur jo banna chahta hai, woh ban jaaye.

Ruko zara, thoda araam se karo cheezein, itni tension lekar padhai karogey, kuch samajhne ki koshish karogey, kuch yaad karne ki koshish karogey toh, kuch nahi ho payega. Tension lekar padhai karna itna asaan nahi hota. Aur sirf achha score karna zaroori nahi hota. Achhe score ke saath saath knowledge gain karna bhaut zaroori hota hai.

Humare upar pressure hota hai achha score karne ka, sabse aage aane ka, us chakkar mein hum yeh bhul jaate hain ki, padhai ka maqsad, in books ka maqsad sirf score karna nahi, inse knowledge gain karna hai, agar woh nahi kiya toh aapke 100 out of 100 score karne ka bhi koi fayda nahi kyunki, aage chal kar, job interviews mein aapke score se zyada aapki knowledge test ki jaati hai. Yeh baat shayad hum 12th mein reh kar nahi samajh paatey, lekin yeh sab humein bahut late samajh aata hai.

Isiliye, jo bhi padh rahe ho, jitne bhi der padh rahe ho, usey achhe se samajh ke padho taaki ussey kuch seekho, kuch knowledge gain kar sako, na ki sirf score karne ke liye padho. Scores aapko kuch saalon tak aage dhakel sakte hain, lekin aapki knowledge, aur aapki kabiliyat aapko zindagi ki mushkil se mushkil job, business ya koi bhi task ko complete karne mein help karegi. Life mein sirf career se related hi challenges nahi aatey, challenges life mein aur bhi aate hain, jinko aap achhe marks se nahi balki achhi knowledge se face kar sakte hain.

Jab kaabil banogey, knowledge gain karogey, har ek cheez ko samajh ke chalogey toh scores apne aap improve ho jayenge, isliye scores se zyada padhai pe dhyaan do. First ki jagah second bhi aa jao toh koi baat nahi, lekin aapki knowledge, aapki samajhdari us first aane wale student se zyada behtar hai toh aap bhale hi class ya subject mein second aaye hain, lekin aap life mein first aa gaye ho aur aage rahogey.

Bhale hi 12th class kitna hi daraye, uske exams, uska result kitne hi darayein, lekin aapko darr-darr ke nahi balki sachche mann se padhai karni hai. Doosron ke liye nahi, khud ke liye karni hai. Zindagi aapki hai, career aapka hai, jo milega aap hi ko milega. Jo bo-ogey, wahi katoge. Jo karogey, aap hi karoge, toh better hai aap achhe se apne liye aur sachche mann se padhai karo, results ya marks ko lekar overthinking mat karo.

Jitna zyada time sochne mein waste karogey, utna agar padhne mein laga do toh bahut kuch gain karogey. Tension zaroor hoti hai is waqt apne career ki, lekin tension lene se kabhi koi insaan zindagi mein aage nahi badha hai, balki peeche hi raha hai. Relax karke padhai karo, achhe se mann laga ke karoge, toh zaroor success milegi.

Class 12ke Baad Kya Karein?

Class 12 clear hone ke baad ek aisa samay aata hai, jab bahut se students, atak jaate hain ek jagah par, jahan par unhein yeh decide karna hota hai ki woh kaunsa course karein aagey. Kaunse college mein admission lein? Kaunse competition ki tayari karein?

Jidhar dekho log admission ke liye bhaag-daud macha rahe hote hain. Agar aap ke saath ke dost admissions lena shuru kar dete hain, apply karna shuru kar dete hain aur aap tab bhi confuse hote hain ki, ab aapko aage kya karna chahiye toh aap bahut overthinking karne lagte hain.

Dimaag mein yahi chalta rehta hai ki, kya karein? Kaunsi field mein jaayein aur aage ki life kaisi hogi? Career kaisa hoga? Job kaisi hogi? Kaam kya kar rahe honge? Aisi kayi baatein dimaag mein chal rahi hoti hain aur humein kayi baar guide karne wala koi bhi nahi hota.

Chinta mat karo, yeh phase har student ki life mein aata hai. Bahut se bachhon ka vision crystal-clear hota hai ki unhein aage chal ke kya karna hai, lekin bahut se students khud ko explore nahi kar paate hain, unhe yeh tak nahi pata chal paata ki woh kya karna chahte hain apni life mein, kaise aage badhna chahte hain, unka interest kis cheez mein hai. Aise sawaal agar aapke mann mein bhi chal rahe hain toh, kuch baaton ka dhyaan rakhiye.

Sabse pehli aur sabse zaroori cheez: itni tension mat lo, jo bhi karogey life mein, jahan bhi jaogey, jis field mein jaogey, jis profession ki ore badhogey, raaste apne aap khulte chale jayenge. Ho sakta hai jo field choose karo, usey aage jaa kar change kar do, koi job kar rahe ho aur aage ja kar puri ki puri job hi switch kar do.

Hum aksar pehle se soch kar chalte hain ki, hum yeh karenge, woh karenge, lekin jaise-jaise hum aage badhte hain, grow karte hain, ya toh humein kuch aur ideas aa jaate hain, ya humara interest kisi aur cheez mein develop karne lagta hai. Twelfth ke baad jo bhi karogey, us par aapka pura career dependent ho, aisa bilkul bhi zaroori nahi hota.

Life bahut zyada unpredictable hoti hai, kuch pata nahi agle mod par kya ho jaye, ya kuch saalo mein kitna kuch badal jaye, kuch pata nahi rehta, aaj hum kya kar rahe hain aur agle kuch mahino ya saalo mein kya karne lagenge, kuch pata nahi chalta. Logon ki zindagi mein aise aise incidents ho jaate hain ki, unki zindagi pal bhar mein badal jaati hai.

Sochte kuch hain aur kar kuch rahe hote hain. Isliye zaroori nahi ki hum jo soch kar chalein, aage humare saath wahi ho. Jo humari destiny mein likha hai, wahan tak humein woh pahucha hi deti hai, maangti hai toh bas bahut saari mehnat aur lagan.

Life mein jo bhi bano, chahe writer bano, engineer bano, doctor bano, designer bano, aise bano ki aap se behtar koi ho hi na, na is sheher mein, na is desh mein, aur na is duniya mein. Aapka jis cheez mein, jis kaam mein, jis field mein interest ho, uski ore aage badho. Agar kisi bhi field mein interest nahi hai ya samajh nahi aa raha toh ek basic course se shuruwaat karo, lekin apne aap ko roko mat. Aage badhte jao, jahan apne aap ko rok liya toh waha dikkat ho jayegi. Achhe se research karo internet par ki kaun-kaunsi fields hoti hain.

Class 12 ke student ko at least itna toh pata hota hai ki woh kya kaam behtar tareeke se kar sakta hai, usko kya achhe se karna aata hai. Agar aapko itna bhi clear ho jaaye toh aapko uske baare mein research karne mein problems nahi hongi. Kya field hai, uska process kya hai, admissions kaise aur kab tak honge, criteria kya hai, eligibility kya hai, har cheez samajh mein aa jaati hai.

Jis field mein bhi jaogey, aage badhte jaogey aur raaste khulte jaayenge. Bahut se colleges mein toh option hota hai starting ke kuch days ya months mein course switch karne ka, toh agar aapke saath aisa kuch ho jaaye ki aapke admission lene ke baad aapko realize ho ki aapko kuch aur karna tha ya aap ko kisi aur course mein interest aa jaaye toh woh bhi aap kar sakte ho.

Ek insaan ka tension-free hona bahut zaroori hota hai, choti-choti baat par panic karna, overthinking karna sahi nahi hai. Araam se baith kar thande dimaag se agar sochoge toh zaroor aapko koi na koi raasta dikhayi dega. Haan, jaldbaazi mat karo kuch bhi karne ki, apne aap ko waqt do sochne-samajhne ka, achhe se research karne ke baad hi kisi decision par pahuchna. Apne parents se, ya apne bade bhai-behen se, ya fir kisi teacher se zaroor discuss karo koi bhi decision lene se pehle, kyunki ek experienced insaan ki advice bhi zaroori hoti hai.

Jaise-jaise hum life mein aage badhte hain, jaise-jaise humara mind explore karta hai aur grow karta hai, waise-waise humein humara vision clear hota chala jaata hai. Class 12 ka student bhi itna experienced nahi hota jo apne pure career ko usi waqt decide kar le. Jo hote hain woh apne direction mein jaane lagte hain par jo nahi hote woh bhatakte hain.

Bhatakna bhi koi zindagi bhar ke liye nahi hota. Aisa mat socho ki agar aaj galat decision le liya toh ab aage ki puri zindagi barbaad, ya pura career khatam. Khatam kuch nahi hota, raaste apne aap khulte hain jaise hi hum apni journey ko fir se shuru karte hain, haarte hum tab hain jab hum yeh samajh lete hain ki hum haar gaye.

Idhar-udhar haath-pair marte raho, kuch naya try karne se peeche mat hato, kuch naya seekhne se bhi peeche mat hato. Jahan ho, jo kar rahe ho, usey pure dil se karo, puri khushi ke saath karo, woh zaroor achha lagega, aur agar jo kar rahe ho usme zara bhi khushi nahi mil rahi toh apne aap se pucho ki aakhir kya kar ke khushi milegi. Fir jo karke khushi mile wahi karna shuru karo. Aakhir mein khushi hi maayine rakhti hai, chahe aap life mein kuch bhi kar rahe ho, agar aap khush nahi ho apne kaam se, apne profession se, toh aap kabhi usme grow nahi kar paoge.

Agar Fail Ho Gaye Toh Kya Karein?

Fail ho jaana, khaaskar Class 12 mein, sabse zyada affect karta hai ek student ke mind ko. Fail hone ke baad jo circumstances hote hain, woh ek student ki mental health ko bahut bigaad sakte hain. Parents ka pressure, relatives ka pressure, society mein aapki or aapke parents ki badnaami, friends ka pass ho jaana aur aapka fail ho jaana, yeh sab aapko bahut zyada negative feel karane lagta hai. Negative aur suicidal thoughts aane lagte hain.

Apne future ko lekar bahut insecure feel hota hai, saal barbaad ho gaya is cheez ko lekar kaafi depression hota hai. Mehnat kari thi ya nahi kari thi, ussey koi fark nahi padta, kyunki woh cheez koi nahi samajhta. Har koi demand karta hai marks ki, pass ho jaane ki aur jab aapki saari mehnat ke baad bhi aapka result achha na aaye aur aap fail ho jaaye toh aap depression mein chale jaate hain. Parents ko face karne mein darr lagta hai—pitayi ka darr toh hota hi hai, lekin uske saath-saath khud ki nazron mein gir gaye, aise thoughts bhi aate hain. Tum ghabrao nahi, aur meri baat dhyaan se padho.

Main samajh sakta hu ki aap ne mehnat kari thi aur aap fir bhi exam clear nahi kar paaye. Lekin khud ko loser mat samjho. Losers woh hote hain jo khud ko haara hua maan lete hain aur koshish karna band kar dete hain. Agar aap aaj fail ho bhi gaye toh kya dobara koshish karna ya attempt karne ka option nahi hai? Bilkul hai, agar ek baar mein exam clear nahi ho paaya toh dobara mehnat karna. Daant mile kisi se, maa baap mein se koi maare toh bhi koi baat nahi, bhale hi maar kha kar mehnat karna, lekin phir se koshish zaroor karna.

Apne aap ko itna haara hua mat samjho. Yeh samajhne ki koshish karo ki aakhir galtiyan hui kahan, kami aapki tayaari mein thi ya aap ne jo exam sheet mein likha hai usme thi. Kayi baar humein answers pata hote hain, lekin hum unhein achhe se likh nahi paate. Agar aapko yeh pata hai ki aap ne tayari puri imaandari se nahi ki thi toh galti aapki hai aur aapko yeh galti accept karke, aage aur bhi zyada mehnat karni hogi, taaki dobara fail na ho jao.

Agar aapko aisa lagta hai ki kami aapki tayaari mein nahi balki aap ke answers ko achhe se na likhne mein thi toh aap apne us weak point ko improve karo, kyunki jab tak exams clear nahi ho jaate, saare subjects mein aap pass nahi ho jaate, tab tak aage nahi badh paogey.

Isliye apni kami ko samajhna bahut zaroori hai, kahan galti hui hai, kis cheez ki wajah se hui hai, us cheez ko thik karo aur ek baar fir koshish karo. Pachhtava karne se baith ke rone se kuch badlega nahi, beete hue kal ko nahi badla ja sakta, sirf aaj ko thik kiya ja sakta hai taaki aane wala kal thik ho aur beete hue kal se behtar ho. Humare aaj ke actions kahin na kahin humare kal mein reflect zaroor hote hain.

Jo hua us par baithke pachhtava karne ka koi fayda nahi hai. Agar aapko lagta hai ki aapka mann nahi lagta padhai mein ya aap itne hi kaabil ho, toh apni capabilities ko challenge karo. Aap abhi bhi chaho toh bahut kuch badal sakte ho. Zindagi khatam nahi hui hai, isey apni zindagi ka aakhiri waqt mat samjho. Aapke dimaag mein aise kayi khayaal aa rahe honge ki aap khud ko khatam karlo, ya agar doosron ke mazaak udane se pareshan hokar aap suicide jaise steps lene ke baare mein soch rahe ho toh wahin tham jao. Kisi se baat karo, unhe batao ki aapke mann mein kya guzar raha hai. Kayi counselling helplines hote hain, unhe phone laga sakte ho.

Logon ko chhodo, unka kaam hai neeche zameen par gire hue insaan par hasna, uska mazaak udana. Agar aapko itna hi bura lag raha hai unka mazaak udana toh unhein jawaab do, muh se nahi, khudko kamyab banake, khud ko pass kara ke, khud ko un sabse aage nikaal ke. Aise logon ko jawaab muh se nahi actions se diya jaata hai, apni kamyabi se jawaab diya jaata hai.

Agar aisa koi dost bhi hai jo aapke fail hone par khush ho raha hai, aap ka mazaak bana raha hai toh uska saath chhod do turant. Agar ek dost doosre dost ke fail ho jaane par khush ho toh uski dosti ka koi fayda nahi hai, kuch bhi haasil nahi hoga uski dosti se aapko.

Khud ko khatam karne ke baare mein bhi bilkul mat sochna. Aap fail hue ho, failure nahi ho, haare nahi ho apni zindagi se. Failure woh hota hai jo ya toh kabhi attempt hi nahi karta, ya give up kar deta hai thoda sa try kar ke. Aap ne koshish kari, aap fail hue, koi baat nahi. Ab aap dobara koshish karo. Jitni bhi der kyun na lag jaaye, aap koshish karte raho. Dekhna, ek na ek din aapko success zaroor milegi.

Jaan rahegi toh zindagi mein bahut kuch haasil kar sakogey, jo socha tha agar woh nahi kar pa rahe ho, ya kar sakte ho toh koi baat nahi, zindagi ke humare liye kuch aur plans bhi hote hain. Aap ne bhale hi socha ho ki main yeh banunga, lekin agar aapki kismat mein woh banna nahi hai, ya aapki zindagi ko kuch aur hi manzoor hai toh, usey accept karo aur jo kar sakte ho, jo ban sakte ho, woh bano.

Na hi khud ko khatam karne ke baare mein socho, aur na hi khud ko loser maano. Aap mein ab bhi bahut zindagi baaki hai, aap ke haunsle itni asani se nahi toot sakte. Issey mushkil exams aayenge zindagi mein, issey mushkil hoga unka saamna karna, unhein clear karna toh kya aap har baar itni asaani se toot jaoge? Nahi, aap na tootogey, na haar manogey, bhale hi aap darr jaogey, ghabraogey, gir jaogey, lekin phir uthogey, ek baar phir koshish karogey aur itni mehnat karogey ki jeet sirf aapki hi hogi.

Pata hai problem kahan aati hai? Jab aap mehnat se zyada results ke baare mein sochte ho. Arey, apne focus ko zara change karo, agar results ke baare mein sochte reh jaoge toh time bhi waste hoga, score bhi achha nahi kar paoge aur khudko sabse peeche paoge. Results se dhyaan hata kar sara dhyaan, saari mehnat, padhne mein laga do, result apne aap improve ho jayega.

Aur kabhi bhi yeh mat socho ki doosre tumse aagey nikal jayenge, ya peeche reh jayenge. Tumhara competitor sirf tum ho, aur koi nahi. Na hi tumhara competitor koi senior hai, na junior aur na hi tumhare saath ka koi. Tum khudko challenge karke hi achha score kar sakte ho, apni capabilities ko challenge karna hi sabse badi samajhdari hoti hai. Doosron ko mat dekho ki woh kya kar rahe hain, khud ko dekho ki tum kya kar rahe ho, kitna prepare kar liya tumne aur kitna baaki hai.

Handle karna seekho problems ko, unse bach ke bhago mat, shortcut mat dhundo apni pareshaaniyon se bahar aane ka. Khud ko chot pahuchana, khud ko khatam karne jaise decisions aapko aapki problems se bahar nahi nikalte hain.

Apne liye nahi toh apne parents ke baare mein socho, us maa ke baare mein socho jisne aapko apni kok mein nau mahine paala aur kitna dard sehen karke janam diya. Aaj woh zara sa gussa ho bhi gayi toh kya hua?

Haq hai us maa ka apni aulaad se naraaz hone ka, usko daantne ka. Us daant se ya maar se bhaago mat. Maa-baap ki daant aur maar sirf zindagi mein aage badhna sikhati hai, aankhein kholti hai, aur usey kabhi bhi negatively nahi lena chahiye.

Saamna karo unka aur unse bhi aur khud se bhi wada karo ki aap dobara koshish karogey, aur zaroor successful hoge chahe kuch bhi ho jaaye. Itna negative mat socho, aur jo hua usey accept karo, apni kamiyon ko dekho, unhe sudharo, aur zindagi mein aage badho. Waqt bahut keemti hota hai, usey kabhi bhi waste mat hone do. Thoda waqt lo sochne-samajhne ka, aur fir se koshish karo, lekin koi bhi galat kadam uthane ke baare mein kabhi bhi sochna mat.

Job se Judi Kuch Baatein

School life, college life, in sab ke baad ek aisa phase aata hai humari life ka jisme humne jo bhi aaj tak seekha hai, jo bhi humne padhai kari hai, woh practically implement karna padta hai. Jo bhi skills develop karte hain, jo knowledge gain karte hain, ab usey implement karne ka samay aata hai. Usey hum apni job mein use karte hain taaki hum behtar perform kar sakein aur grow kar sakein.

Jab hum job dhund rahe hote hain toh us waqt bhi hum kaafi pareshaniyon ka saamna karne lagte hain, kaafi negative hone lagte hain, kaafi overthinking karne lagte hain. Yeh woh phase hota hai jab hum job dhundne ke liye struggle karte hain aur humein milti nahi hai. Humein har jagah se rejection mil rahe hote hain, kahin selection nahi hota, ya pasand ki job nahi milti hai, jiski wajah se hum bahut sochna shuru kar dete hain aur bahut tension lene lagte hain.

Apne career ko lekar tension lene lagte hain, khud par doubts hone lagte hain, khud se sawaal karne lagte hain, confidence low hone lagta hai. Samajh nahi aata kaise deal karein aisi situation mein, kaise positive rahein, kaise confident feel karein interviews mein, ya kaise apni job ko achhe se kar payein.

Sabse pehle baat karte hain struggle phase ki. Agar aap job dhund rahe ho aur aapko mil nahi raha, ya jo mil raha hai woh pasand nahi aa raha, aapko aisa lagta hai ki aap ussey better deserve karte ho, toh koi baat nahi. Thoda relax karo aur problem par focus karne ki jagah solution par focus karo.

Kami kahan aa rahi hai? Kya kami aapke confidence mein hai, ya aapki knowledge mein? Agar aapko lagta hai ki kami aapki knowledge mein hai, toh achhe se tayari karo us particular subject ki jis par woh job based hai. Jitni achhe se tayari karoge utni zyada knowledge gain hogi, aur jitni zyada knowledge hogi, utna zyada confidence bhi aayega jawab dene mein aur interviewer ke saamne baithne mein.

Apni knowledge par work karna shuru karo aur itni knowledge gain karlo ki aap se koi kuch bhi puch le, aap hichkichaoge nahi. Zyada advance nahi toh kam se kam basic cheezein toh clear honi chahiye aapko apne subject ki. Achhi knowledge insaan ko bahut aage lekar jaati hai zindagi mein.

Ab sirf knowledge gain karne se bhi kuch nahi hota. Kayi baar humein jawaab pata hota hai, lekin hum usko achhe se deliver nahi kar paate. Confidently jawab dena bahut zaroori hota hai. Agar aapki body language mein, aapke answers mein confidence nahi hoga toh interviewer aap se kabhi impress nahi hoga. Confidence se duniya ki badi se badi cheez haasil kar sakte ho, bas dhyaan rahe overconfident na ho jao.

Jis cheez mein confidence ki kami hai, usi cheez par work karna shuru karo. Agar kami aapke bolne mein hai, toh bolne ki practice karo. Band kamre mein sheeshe ke saamne khade ho kar apni aankhon mein aankhein daal kar practice karo. Shuruwaat mein bhale hi ajeeb lage, lekin dheere-dheere aapko khud apne andar badlaav dikhega.

Humare saath yahi hota hai. Agar kisi cheez ki aadat nahi hai humein toh shuruwaat mein toh kaafi dikkatein aati hain woh kaam karne mein, lekin jaise-jaise humein aadat padti hai, waise waise hum us kaam mein, us cheez mein behtar hote chale jaate hain.

Bahut purani kahawat hai, ‘Practice makes perfect.’ Aap bhale hi perfect banne ke peeche mat bhago, lekin aapko itni practice karni hai ki aap ka confidence boost bhi ho aur aap interviews clear bhi kar paao.

Pehle khud se baatein karo, aur phir kisi se baat karne ki practice karo. Family ya friends mein se kisi se baat karo, unke saath practice karo interview dene ki. Aur sabse badi baat, interviews dene ki aadat banao, kayi jagah try karo—jitne zyada interviews dogey, utna zyada samajh aayega ki, aap kahan chook jaate ho baar-baar, aur kahan galtiyan ho rahi hain.

Agar aapko pata chalta hai ki kisi company mein vacancy hai lekin aapko lagta hai ki aapko wahan apply nahi karna, phir bhi aap interview dene jao, baitho interviewers ke saamne. Dekhna, aapko ek naya experience hoga, aur apni galtiyon ko iss tarah sudhaar bhi paoge.

Aapko samajh aayega ki kaise aapko bolna hai, kaise jawaab dene hain, kaise uthna-baithna hai unke saamne, kya cheezein hain jo aapko avoid karni hain, kin cheezon ka answer kaise dena hai. Interviewers kayi baar seedhe tareeke se nahi balki ghuma ke sawaal-jawaab karte hain aur humein test karne ki koshish karte hain ki hum kitne confident hain, kitne stable hain us job ke liye.

Bhale hi us interview ke end mein aapko rejection mil jaye, lekin phir bhi aapko wajah pata chalegi. Phir jab kamiyan pata chalti hain toh hum apne aap un kamiyon ko thik karte hain aur doosre interviews mein un galtiyon ko sudharne ki koshish karte hain.

Agar aap kisi specific company ke liye try kar rahe hain aur aap uske interview ko clear nahi kar pa rahe hain toh patience rakhiye, aur samajhne ki koshish kariye ki aakhir galtiyan ho kahan rahi hain. Jab galti samajh aa jayegi, toh aapka raasta bhi clear ho jayega. Agar is sab ke baad bhi aap clear nahi kar pa rahe hain us interview ko toh phir aapko bina apna zyada waqt zaaya kare kisi aur company ki ore dhyaan lagana padega.

Aap apne saare efforts kisi ek jagah par nahi laga sakte, aap apna saara time kisi ek jagah ke liye nahi kharch kar sakte. Aapko apne time ki value karni hogi. Aur kya pata aapke liye bhagwan ne kuch aur hi plan kar ke rakha hua ho.

Isliye koshish karo, lekin ek hadd tak. Aisa na ho jaye ki ek hi cheez ke peeche bhaag-bhaag kar apna time waste kar rahe ho, aur aakhir mein kaafi late ho jaaye. Zyada tension mat lo, bas koshish karte raho, interviews bhi dete raho, koi na koi toh clear hoga hi aur kahin na kahin se toh shuruwaat hogi hi. Ho sakta hai aapki expectations se kam ki job mile ya zyada ki mile—jaisi bhi milegi, shuruwaat karni chahiye. Woh aapko aapki manzil tak pahuchayegi.

Job Mein Problems

Life itni asaan nahi hoti hai jitni humein lagti hai, jitna hum sochte hain, jitna hum doosron ko enjoy karta hua dekhte hain, ya jitna hum movies mein dekhte hain. Life har mod pe kuch na kuch naya lekar aati hai humare saath. Kabhi ladai-jhagde, kabhi khush khabar, toh kabhi koi dukhbhari khabar, life kayi tarah ki problems se hoti hui guzarti hai.

Kabhi-kabhi problems itni badh jaati hain ki hum upar dekhte hue bhagwan se sawaal karte hain ki, ‘Aakhir mere saath hi kyun hota hai aisa? Kyun meri life itni mushkil aur itni challenges bhari banayi hai?’ Aisa lagta hai jaise saari problems humari life mein hi de di ho bhagwan ne.

Pehle school mein tension, phir school se nikle toh college mein tarah-tarah ki tension, college se nikle toh job lagne mein struggle aur uski tension, family agar sorted nahi hai toh family ki bhi tension, aur jaise-taise job lag jaaye thoda khud ko distract karne ke liye is sab se toh usme bhi tension. Aur in sab tension ko discuss karne ke liye jab koi hota nahi hai, jab khud hi sab kuch handle karna padta hai, khud hi sab kuch face karna padta hai toh wakayi mein insaan toot jaata hai.

Jaise-jaise humari life aage badhti hai, problems aati hain, toh hum bhi unse lad lad ke khud ko strong bana lete hain, khud ko strong samajhne lagte hain. Hum bahar se kitni hi moti layer bana lein strength ki, lekin, andar se hum emotional hote hain, hote hain humare andar kayi jazbaat jinko hum bayaan bhi nahi kar sakte kisi ke saamne.

Kitne hi hum strong ban jayein, lekin hum sabki life mein ek aisa mod toh aata hi hai jab hum puri tarah toot jaate hain, jab hume bhi rona padta hai. Tab zyada bura lagta hai agar koi woh aansu pochne ke liye bhi nahi hota.

Overthinking bhi in sab wajahon se itni hone lagti hai ki aisa lagta hai jaise har waqt dimaag mein ek shor mach raha hai. Har waqt ladaiyan ladi jaa rahi hain dimaag mein, pura mindf**k ho gaya hai. Kayi sawaal, kayi situations humare dimaag ko jakad ke rakhti hain aur hum bahut bebas aur lachaar mehsoos karne lagte hain. Kyunki humein yeh samajh mein nahi aata ki aakhir hum karein kya is sab se bahar nikalne ke liye, kaise apni life problems se deal karein, kaise khush rahein. Jitni dhundne ki koshish karte hain hum khushiyon ko, woh utni door hoti chali jaati hain. Kabhi milti bhi hain toh expiry date ke saath aati hain.

Baat karte hain job se judi problems ki. Hone ko toh bahut saari ho sakti hain, lekin hum kuch common problems ke baare mein baat karenge, aur samjhenge ki kaise hum un situations, un problems se deal kar sakte hain aur apne aap ko un problems se bahar nikaal sakte hain. Bhale hi problems khatam na ho, lekin unko kaise face karna hai, ya unse kaise ladna hai, yeh zaroor pata chalega.

Colleagues se ladai hona

Hum jaise hain, doosre bhi waise ho aisa zaroori toh nahi. Hum doosron mein khudko dhundte hain, doosron ke saath adjust karne ki koshish karte hain, ek chota sa bharosa karne ki koshish karte hain. Par jab do logon ke nature aapas mein nahi milte, ya ek-doosre se bahut zyada opposite hote hain, toh ladaiyan bhi ho jaati hain.

Ladai hone ki kayi wajah ho sakti hain. Aap dono mein se kisi ke kharaab behaviour ki wajah se ladai ho sakti hai, kaam ko lekar ladai ho sakti hai, progress ko lekar ladai ho sakti hai, promotions ko lekar ladai ho sakti hai, misunderstandings ko lekar ladai ho sakti hai, aapki aur aapke manager ya team lead se aapki ladai ho sakti hai. Profession koi bhi ho, agar hum ek office mein kaam kar rahe hain, aur us office mein humare alawa aur bhi log hain, aur humara unse interaction hota hi hai toh humari unse ladai bhi ho jaati hai kisi na kisi baat par.

Ab ladai toh ho gayi, lekin is ladai ka hum par yeh asar hota hai ki hum us baare mein sochne bahut lagte hain, bahut zyada pareshan hone lagte hain, overthinking karne lagte hain. Humein samajh nahi aata ki hum kya karein.

Us ladai ke peeche bhale hi galti kisi ki bhi ho, lekin uska asar hum par, humari mental health par padne lagta hai. Shuruwaat mein kuch bhi ho, ek baar ko phir bhi hum ignore kar dete hain, lekin agar koi cheez kaafi lambe arse se chali aa rahi hai, ladaiyan kaafi zyada ho rahi hain, toh aapko yeh karna hi hoga.

Dekho, sabse pehli baat, koi bhi ladai pehle baat karke solve karne ki koshish karni chahiye. Wajah ko samajhne ki koshish karni chahiye aur aisa solution nikalna chahiye us problem ka jo dono ke liye thik ho, jisse ladai hona band ho jaaye.

Shuruwaat mein koi bhi bada action mat lo agar baat itni badi nahi hai. Pehle apne level par handle karo us cheez ko. Lekin agar woh handle nahi ho raha hai toh uske baare mein apne manager ko batao jinko aap report karte ho. Sochne se, ignore karne se aur tension lene se kuch solve nahi hota, solve hota hai actions lene se.

Hum kayi baar yeh soch kar ignore karte chale jaate hain kisi ke misbehaviour ko ki ho sakta hai apne aap thik ho jaaye. Lekin agar aap doosron ko isi tarah let go karte rahenge toh woh aapko aur bhi zyada pareshan karne lagenge ek soft target samajh ke.

Koi bhi baat agar aisi ho rahi hai jo aapko bahut hit kar rahi hai, jo aapko bahut zyada affect kar rahi hai toh aap usko seriously lena shuru karo aur us par koi na koi action lo. Jab hum bahut zyada bardasht karna shuru kar dete hain toh humare andar woh cheez ikatthi hone lagti hai aur hum pareshan ho jaate hain ki hum kya karein, kaise us sab se bahar niklein.

Nikalne ke kayi tareeke hain, ya toh us shaqs se aapko jo bhi problem hai woh baat kar ke nipta lo, ya agar aapko lagta hai ki koi aapko pareshan kar raha hai toh uske khilaaf zaroor complaint karo senior authority se, taaki usey bhi sabak mil sake aur aapko bhi mental relief mil sake.

Colleagues se pyaar hona

Pyaar toh ek aisa ehsaas hota hai jo na jagah dekhta hai, na insaan, na waqt, woh jab hona hota hai, jiske saath hona hota hai, woh ho hi jaata hai. Pyaar jaise ehsaas par kisi ka bas nahi chalta. Jis jagah par hum apne din ke aath se dus ghante bitate hain, us jagah ke logon mein bhi hum ghulne-milne lagte hain.

Kuch colleagues ke saath humari bonding aisi hoti hai jaise unhein kitne waqt se jaante hain. Kuch colleagues dost ban jaate hain, toh kabhi-kabhi aisa bhi hota hai ki kisi shaqs ke hum kareeb aane lagte hain, ya kabhi kisi se humein emotional support milne lagta hai jo hum kisi apne mein talaash rahe the.

Door baithe kisi aur department ke kisi shaqs ko hum baar-baar dekhna chahte hain, bahane se uske cabin ke aage se nikalna chahte hain, baat karne ke bahane dhundte rehte hain, paas aane ke bahane dhundte rehte hain, tarah-tarah se approach karne lagte hain. Kisi din woh na aayein workplace pe toh mann nahi lagta, unse baat karo toh apnapan sa mehsus hota hai.

Kuch isi tarah ki baatein hone lagti hain jab humein koi colleague kuch zyada hi pasand aa jaata hai. Hum is tarah attract ho jaate hain unki taraf ki phir humara mann hi nahi lagta unke bina. Is tarah ki feelings humein aksar apne kaam se bhi distract karti hain aur humari personal life mein problems bhi create karti hai.

Yahan cheh situations ke baare mein baat karenge:

Jab aap single ho

Jab aap relationship mein ho

Jab aap relationship mein ho lekin happy nahi ho

Jab aap single ho aur woh relationship mein hain

Jab aap bhi relationship mein ho aur woh bhi relationship mein hain

Jab aap career-oriented ho

Inhi mein se ek situation hoti hai humare saath, jis wajah se hum zyada overthinking karne lagte hain jab humein kisi colleague se pyaar ho jaata hai.

Jab aap single ho

Agar aap single ho aur aap kisi ki taraf attract ho rahe ho, aur aap is baat se kahin na kahin pareshan ho, aur samajh nahi aa raha ki, aap kaise deal karogey is situation se toh chinta ki koi baat nahi hai.

Agar aapki ussey baat hoti hai, agar woh aap ke department mein hai aur aap ussey daily milte ho toh, yeh kaafi achhi baat hai. Agar aap kaafi positive ho us shaqs ko lekar aur aapko uske saath apnapan lagta hai aur aapko zyada time nahi hua hai ussey baat kare hue, mile hue, toh sabse pehle aap uske saath apni bonding strong karo, uske baare mein jaano.

Humein aksar jaldbaazi hoti hai logon ko apna banane ki, jo hamesha cheezein kharaab kar deti hai. Isliye kisi bhi tarah ki jaldbaazi mat karo aur unhey jaano, unhey samjho—woh kaise hain, kaisa behave karte hain, kaise aap ke saath hain aur kaise baaki sab ke saath hain, woh aap ke baare mein kya sochte hain.

Kya woh bhi aapki taraf attracted hain? Aapki understanding kaisi hai unke saath? Kaisi soch hai unki, aur yeh soch aap se milti hai ya nahi? Unka relationship status kya hai? Kitna bharose ke layak hai woh? Kaise situations ko handle karte hain woh? Yeh sab cheezein observe karne ke baad hi kisi ke saath relationship mein aaya jaata hai.

Sirf pyaar hone par propose kar dena koi samajhdari nahi hoti hai. Relationship ke baare mein agar soch rahe ho toh saamne wale shaqs ko pehle achhe se samjho. Baatein karna zaroori hai, aap log apne working hours ke baad kya karte ho, kiske saath time bitate ho, woh kya karte hain, yeh sab jaanna zaroori hai.

Kayi baar log apne colleagues se apni personal life chhupate hain, aisa main mann se nahi keh raha hoon, pichle cheh saalon mein maine bahut se sessions liye hain apni website anubhavagrawal.com ke zariye, jisme logon ne bataya hai ki unke partner ne relationship se pehle unse cheezein chhupai thi, isliye in sab baaton ko jaanna aur samajhna zaroori hai, taaki kal ko kisi bhi tarah ki anhoni na ho jaaye aapke saath.

Yeh sab pata karne ke baad bhi agar aapko sab kuch positive feel ho raha hai, dikh raha hai unke actions aur words mein, toh definitely aapko aage badhna chahiye aur is relationship ko aage badhana chahiye. Apne pyaar ka izhaar karna chahiye, aur agar negative response aata hai ya doubtful response aata hai toh aapko koi bhi jaldbaazi nahi karni chahiye, pehle apne doubts clear kar lo, phir aage badho.

Agar woh aap ke department mein nahi hain aur na hi aapki unse baat hoti hai, lekin phir bhi aap ke mann mein unke liye feelings bahut strong hain toh zaahir si baat hai, bina unke saath communicate kare baat aage nahi badh sakti.

Aap ko ya toh khud aage ja kar unke saath connection banana padega, ya kisi ke zariye dosti ka haath aage badhana padega, ya phir social media ke zariye bhi aap unhein approach kar sakte ho. Toh himmat karke yeh karo, aur wahi sab karo jo upar kaha gaya hai. Ek achha bond banao, ek achha dost bano, achhe se jaano, samjho, dekho kaisi chemistry hai aap dono ki, phir aage badho, aur sab kuch positive rehta hai toh izhaar kar do apni mohabbat ka.

Jab aap relationship mein ho

Jaisa ki pehle bhi kaha, na pyaar insaan dekh kar hota hai aur na hi jagah, na waqt, na situation, pyaar ho hi jaata hai, feelings aane hi lagti hain. Chahe hum ek happy relationship mein ho ya unhappy relationship mein, humein jab saamne baitha insaan achha lagne lagta hai toh hum achha-bura, sahi galat kuch nahi dekhte aur is feeling ko grow hone dete hain.

Kayi baar jab hum long-distance relationship mein hote hain, tab bhi is tarah ki galti kar baithte hain ya karne ja rahe hote hain yeh soch kar ki door baithe insaan ko kabhi kuch pata toh chalega nahi, toh koi baat nahi, yahan mann lagane ke liye bhi ek insaan ho jayega. Aisi soch rakh kar bhi hum apni feelings ko control nahi kar paate aur apne partner ko dhokha dena shuru kar dete hain.

Kabhi aisa bhi hota hai jab hum apne partner ke saath khush nahi hote, jab humare aur unke beech misunderstandings hoti hain, daily ladai-jhagde hote hain aur hum bahut zyada frustrated ho jaate hain apni relationship se, aur usi waqt humein koi aur shaqs comfort karta hai, ya humare workplace pe jis shaqs ke saath achhi bonding hoti hai, hum uske saath baatein share karne lagte hain. Kayi baar humein woh zyada samajhne lagte hain aur humare dimaag mein humare partner ki image kharab karne lagte hain aur khud ke liye jagah banane lagte hain.

Aisi kayi situations ho jaati hain, cheezein bahut zyada complicated ho jaati hain aur hum apni limits cross karte chale jaate hain, apni loyalty ko break karte hain. Hum yeh nahi sochte ki humare partner ko jab paata chalega ki humara office mein ya humare colleague ke sath affair hai toh, usey kaisa lagega, uska toh dil toot jayega.

Bahut se log consequences ke baare mein kabhi nahi sochte aur galat kadam uthate chale jaate hain. Us waqt jo unhe sahi lag raha hota hai bas wahi karte hain, aur aage chal kar aise faste hain ki unhein khud samajh nahi aata ki ab kaise bahar niklein apne hi banaye hue is jaal se.

Dekho, sabse pehle toh is situation ke baare mein baat karte hain ki agar aap relationship mein ho aur haal-filhaal mein hi aapko koi pasand aane laga hai, aapko uski baatein achhi lagne lagi hain aur aap uski taraf attract ho rahe ho. Toh wahin ruk jao! Uske aage mat badho. Apne achhe-bhale relationship ko kharab mat karo apne recent attraction ki wajah se. Aisa ho jaana bahut normal hai, kabhi-kabhi hum attract ho jaate hain ek naye insaan se relationship mein rehne ke bawajud bhi. Par humara khud ko samjhana baat aage badhne se pehle bahut zaroori hai.

Apne relationship ko kisi teesre insaan ki wajah se kharab mat karo. Kisi teesre insaan ko apni zindagi mein mat lekar aao, chahe samne wala aap se attracted hai aur approach kar raha hai. Agar saamne se approach aa rahi hai toh usey rok do, aur usey achhe se samjha do ki aap iske aage nahi badh sakte, yeh aapki loyalty ke khilaaf hai.

Aap kabhi yeh gawarah nahi karogey ki aapka partner is tarah ki cheez kare. Apne rishte ko tootne se bacha lo, agar aapki anban bhi ho rakhi ho tab bhi koi aisa step mat lo jo aapke phool se rishte ko aapki nadaani ki wajah se chot pahuch jaaye. Apne aap ko control karna asaan nahi hota par karna padta hai, agar cheez galat hai aur mushkil hai toh control karna padega. Kyunki aapki ek galti aapke relationship ko tabah kar sakti hai aur aapko zindagi bhar ke liye dhokebaaz ka tag de sakti hai.

Agar commitment kiya hai toh usey tootne mat do kisi bhi haal mein, kisi bhi situation mein, kisi ki bhi wajah se. Usey kayam rakhna aapki zimmedari hai, aapke partner ke peeth peeche loyal rehna aapki responsibility hai, aisi koi bhi galti mat karo jo aapke partner ka dil tode aur baad mein aapko pachhtave mein daal de.

Kisi bhi tarah ki problems chal rahi ho relationship mein toh unhein solve karne ke baare mein sochna chahiye, aur agar aapko lagta hai ki aap nahi kar pa rahe ho solve toh koi baat nahi, dhokha dene aur naraaz rehne mein fark hai. Us fark ko kam mat karo apni nadaani ki wajah se.

Agar aap aage badh bhi gaye ho tab bhi is cheez ko khatam kar do aaj ke aaj. Dhokha dena sabse bura karm hota hai. Kisi masoom ko saza mat do apni bewakoofi ki. Aaj ke aaj hi is naye rishte ko hamesha ke liye khatam karo aur apne relationship par dhyaan do. Isey aur bhi zyada complicated mat banao. Jo aaj aap kisi ke saath kar rahe ho, kal ko koi aapke saath bhi kar sakta hai, jissey aap beintehaan mohabbat karte hogey.

Zyada sochne mein apna waqt zaaya mat karo aur aaj hi doosre rishte se bahar aao! Aur agar koi rishta nahi hai, sirf feelings aa rahi hain, toh apni feelings ko control karo. Apne partner ke saath zyada se zyada time bitao, us khoye hue spark ko ek baar fir jagao, apne partner ko special feel karao, fir se romance karo, time spend karo unke saath, un haseen palon ko yaad karo jo tumne unke sang bitaye the, unke baare mein saari positive baatein socho, aur phir samjhao khud ko ki, aap ke paas itni saari wajahein hain us shaqs ke saath rehne ki, isliye aapko bilkul dhokha nahi dena chahiye. Is naye shaqs se distract karo khudko taaki aapka bana banaya rishta kharaab na ho jaaye.

Aur agar married hokar yeh sab ho raha hai, tab kam se kam yeh samajhna zaroori hai ki shaadi ka rishta kisi bhi affair se bada hota hai, kisi bhi feeling se gehra hota hai. Agar aapke bachche hain toh kam se kam unka hi khayaal karke apne aap ko rok lo. Bhatakne se roko khud ko. Waqt rehte sambhal jaogey toh achha hoga, warna baad mein complications itni badh jayengi ki sambhale nahi sambhlengi.

Jab aap relationship mein ho but happy nahi ho

Jab aap relationship mein ho, lekin aapki aapke partner ke saath ban nahi rahi hai, ya ladai-jhagde chal rahe hain, ya misunderstandings ho gayi hain jo kaafi lambe arse se chali aa rahi hain. Zaahir si baat hai, jab bhi humare partner ke saath achhi nahi ban rahi hoti hai toh humara dhyaan doosre logon ki taraf jaata hai. Ya toh woh log humare paas aa kar humara dhyaan kheechne ki koshish karte hain ya phir hum khud aage badhne lagte hain unki ore.

Life mein aksar aisa hota hai ki jab humare partner ke saath achhi nahi ban rahi hoti hai aur usi beech agar humein koi aur mile, ek aisa shaqs jo humein samajhta hai, jo wo expectations pure karta hai jo hume humare partner se hote hain, toh woh saalon purana rishta humein bematlab sa lagne lagta hai. Jisey kal tak hum apna sab kuch maante the, ab uski koi bhi ehmiyat nahi reh gayi humare dil mein.

Hum uski ehmiyat karna band kar dete hain aur jo samay humein apne partner ko dena chahiye, woh hum us naye insaan ko dene lagte hain, cheezein sort out karne ki jagah aur bhi zyada complicated hoti chali jaati hain, aur kayi baar toh hum khud hi chizen complicate karte hain.

Dekho, agar aapko aisa lagta hai ki aap ne apna 100 per cent diya hai is rishte ko aur uske badle mein aapko kabhi woh samman, izzat, pyaar nahi mila jo milna chahiye tha, aapka partner itne efforts nahi karta aapko khush rakhne ke liye, is rishte ko majboot banane ke liye, aur aap puri tarah se is naye insaan se attached ho chuke ho aur mann bana chuke ho ki isi ke saath ab aage badhna hai, toh apne partner ko kisi dhokhe mein na rakh kar uske saath har baat clear karlo koi bhi step lene se pehle.

Usey dhokha mat do, uske saath cheating ya double dating mat karo, sab kuch clear rakho. Jo sach hai woh batao, yeh soch ke mat chhupao ki, kal ko kisi ko kuch pata nahi chalega. Koi jhooth zyada waqt tak chhupta nahi, ek na ek din saamne aata hi hai aur jab aata hai, toh apne sang bahut saari pareshaniyan lekar aata hai.

Aap apni hi nazron mein gir jaogey, aapka partner aapko bahut zaleel karega, kyunki koi bhi shaqs jhooth aur dhokhe ko zyada bardaasht nahi kar paata. Ek na ek din uske emotions ka outburst hota hi hai aur uska impact aapke aur aapke partner ki mental health ke upar kaafi padta hai.

Isliye, agar samajh chuke ho ki yahi hai ab aur isi ke saath aage badhna hai, toh har haal mein apni saari feelings confess kar lo taaki kal ko har cheez transparent rahe aap dono ke beech. Rishta rahe ya na rahe, lekin insaniyat bhi koi cheez hoti hai.

Aur agar aapko aisa lagta hai ki aap aur aap ke partner ke beech abhi zyada waqt nahi hua hai cheezon ko kharaab hue, haal-filhaal mein hi kuch baatein hui hain jinki wajah se problems aa gayi hain, aisi cheezein jo mike thande dimaag se sort out kari ja sakti hain, lekin phir bhi aap dono us temporary problem ko sort out nahi kar rahe ho. Is situation se frustrate ho kar aap kisi aur taraf khich rahe ho, ya koi aur aapko apni taraf kheech raha hai, toh aapko apne aapko bhi aur us shaqs ko bhi samjhana chahiye. Chahe kuch bhi ho jaaye, aapko apni temporary problems ki wajah se ek permanent problem kabhi khadi nahi karni chahiye.

Samay do apne rishte ko taaki usey theek kar sako, us beech behekna nahi chahiye, na khud se aur na hi kisi ke kehne ya kuch karne se. Abhi achha lag raha hai, lekin aage chal ke bahut pachhtava hoga ki kyun kar liya khud ke hi haathon se khud ke phool se rishte ka qatl.

Jab aap single ho, aur woh relationship mein hain

Aksar yeh situation bhi hoti hai jahan hum toh single hote hain, lekin hum jiski taraf khich rahe hain, woh kisi aur se committed hain. Aisi situation mein one-sided love bhi ho sakta hai, yaani aapko unse pyar hai par unhe nahi, aur two-sided love bhi ho sakta hai, yaani ki aapko bhi pyaar ho gaya hai unse, aur unhein bhi aap se pyaar ho gaya hai committed hone ke bawajood.

Sabse pehle baat karte hain tab jab aap single ho aur sirf aap ko ek committed shaqs se pyaar hua hai. Dekho, pyaar toh ek aisi feeling hai jis par humara bas nahi chalta. Hum life mein kisi mod par ek aise insaan se milte hain, baatein karte hain, ya sirf dekhte hain aur humein woh pehli nazar ya pehli mulaqaat mein pasand aa jaate hain.

Pyaar toh ho jaata hai, lekin halaat humara saath nahi dete aur hum is pyaar ki hawa mein behte chale jaate hain, bina khud ko roke, bina control kare apni feelings ko. Jitni baar hum unhe dekhte hain, ya unse milte hain, utni baar hume unse pyaar ho jaata hai aur hum samajh nahi paate ki aakhir hum kya karein, kyunki woh shaqs single nahi, relationship mein hain kisi aur ke saath.

Khoon toh bahut jalta hai aisi situation mein, lekin kya karein, sach toh sach hai, aur sach toh bachpan se hi kadwa hota hai. Khair, pareshan hone ki zaroorat nahi hai. Aapko bas itna samajhna hai ki aapko kisi ka rishta ya kisi ka ghar todne ka haq nahi hai.

Bhale hi aap us shaqs se kitna hi pyaar kyun na karne lage ho, lekin aap kisi ka bana-banaya ghar todo ya unke rishte mein darar daalne ki koshish karo, toh woh ek bahut galat cheez hoti hai, woh kabhi mat karna.

Aapke liye mushkil hoga apne jazbaaton par kaabu pana, lekin in jazbaaton se zyada zaroori aur bada sach yeh hai ki woh insaan abhi aap ke jazbaat ke liye kuch kar nahi sakta, aur agar karega toh aap wajah ban jaogey kisike rishte ya family ke tootne ki, jo ki apne aap mein ek bahut hi zyada sharmnaak baat hai. Aap na hi itne selfish ho aur na hi banne ki koshish karna.

Intezaar karne ka bhi koi fayda nahi uske break-up ka ya divorce ka. Yeh sochne mein apna waqt zaaya mat karna ki ek din uska rishta tootega aur aap phir apna chance marogey. Hone ko aisa ho bhi sakta hai, lekin agar nahi hua toh aap apna waqt barbad karoge aur kuch nahi.

Aapko apne dil aur dimaag ko yeh baat samjhani padegi ki aap is sab mein fasna nahi chahte, is sab se bahar aana chahte ho. Aur bahar aane ke liye aapko khud ko rokna hoga uske paas jaane se, uske baare mein sochne se, apni feelings ko badhane se.

Khud ko distract karo jitna zyada ho sake utna, khud ke mann ko samjhao ki aap kisike rishte ko kharaab nahi karna chahte, agar uski jagah aap hote aur aapko koi paane ki koshish karta aur aapka bana-banaya rishta kharaab karne ki koshish karta toh aap par kya beetti. Yeh sab samjhane ki zaroorat hoti hai, accept karna padta hai situation ko. Sach se bhago mat, usey apnao aur sabse zaroori cheez, waqt ko waqt do.

Koi bhi insaan kisi bhi insaan se, ya situation se, move on kar sakta hai, waqt ke saath-saath. suffer toh karta hi hai, lekin is suffering mein bhi woh bahut kuch seekhta hai, aur kisi rishte ko kharab na kar ke woh ek achha karm bhi karta hai, jo ki sabse zyada zaroori hai.

Bas yuhin move on karte hain, dard hota hai, waqt lagta hai, par insaan apni zindagi mein aage badhne se rukta nahi, woh aage badh hi jaata hai. Aap bhi badhogey—bharosa rakho, khud par aur apne khuda par.

Khud ko distract karne ki koshish karo, apne friend circle mein kisi achhe dost se baat karo, ussey zyada se zyada baatcheet karo, ya koi purani dosti jo thodi kam ho gayi thi, usey bhi thik karne ki koshish kar sakte ho, ya social media pe kisi naye dost se baat cheet kar sakte ho. Issey aap zyada se zyada distract ho sakogey aur apne aap ko us insaan se door kar sakogey.

Kabhi-kabhi situation yeh hai ki aap bhi pyaar karte ho aur woh bhi pyaar karte hain aap se, aap baaton-baaton mein aage badhte chale ja rahe ho, lekin sach toh yeh hai ki woh kisi aur ke saath bhi hain, ya toh shaadi-shuda hain ya unke boyfriend/girlfriend hai. Aisi situation mein bhi aapko khud ko aur unhein dono ko samjhana hoga.

Ho sakta hai un dono ki zindagi mein temporary problems chal rahi ho aur usi beech woh aap se attract ho gaye ho, ya woh apne partner se pareshan hain, aur kuch choti-moti baaton ki wajah se woh unse toh zyada baat nahi kar rahe par aap ke close aa gaye hain. Aisi situation mein aapko unhe rokna hoga, bina unke emotionally challenged hone ka fayda uthaye.

Galat hamesha galat hi rehta hai, na hi halaat usey sahi banate hain, na hi waqt, aur galat karna bhi hamesha galat hi hota hai. Agar aap is situation ko sahi banana chahte ho, agar woh aapke saath rehne ki kuch zyada hi zid kar rahe hain, agar woh aap ke saath relationship mein aane ki kuch zyada hi zid kar rahe hain toh aapko unse unke relationship ke baare mein baat karni hogi.

Agar woh apne us relationship ko khatam karke, puri tarah se legally khatam karke, aapke saath aane ke liye tayaar hain har tarah se, emotionally, mentally, physically, toh aap zaroor phir is rishte ko aage badha sakte ho, bejhijhak hoke.

Insaan kabhi-kabhi ek toxic relationship mein fass jaata hai, chahe woh married ho ya unmarried. Aur aise rishto ka khatam ho jaana hi behtar hota hai, toh aise rishte unke sukoon ke liye bhi khatam hone zaroori hain. Aisa karke aap ek achha kaam kar rahe ho. Kabhi-kabhi humein apne saalon ke rishte mein bhi woh pyaar aur sammaan nahi milta, woh understanding nahi milti, woh emotional support nahi milta, jo humein kuch chand mahinon ke ek naye rishte mein milne lagta hai.

Halaaki itni jaldi kisi ko bhi judge nahi karna chahiye, us nayi dosti ko waqt dena chahiye, aur agar lagta hai ki yeh insaan wakayi mein sahi hai, tabhi us rishte ko mauka dena chahiye. Kyunki, kayi baar log aap ke emotional hone ka fayda uthane lagte hain aur aapko kisi na kisi tarah use karna chahte hain, chahein emotionally, chahein financially ya phir physically. Isliye dhyaan dena zaroori hai is naye rishte par bhi. Aankh band kar ke koi faisla mat lena, aur aisa faisla lo jisme aap dono ki hi bhalai ho, emotionally bhi, aur practically bhi.

Aur aisa tab hi karna chahiye jab us shaqs ka rishta wakayi mein bahut zyada toxic ho aur woh khud bahar aana chahte ho ussey. Agar aapko lagta hai ki ek mauka dene se ya baith ke sort out karne se cheezein thik ho sakti hain, toh zaroor us shaqs ki madad karo apne rishte ko majboot karne ke liye

Pyaar ka matlab sirf haasil karna nahi hota, pyaar ka matlab us insaan ka achha chahna hota hai, us shaqs ko hamesha khush dekhna hota hai, uske liye sahi chunna hota hai.

Bas is ek cheez ka dhyan rakhna, unke baare mein tab hi zyada sochna jab woh apne relationship ko officially khatam karke aa gaye ho. Kyunki, aisa bahut baar hota hai ki, log bade-bade waade karke aa to jaate hain humare saath relationship mein, lekin woh apne relationship ko end nahi kar paate, aur baad mein khud palat jaate hain aur tumhein beech mein chhod ke chale jaate hain duniya-jahaan ki mohabbat dikhake, aur tumhare andar mohabbat ka diya jala ke.

Jab aap bhi relationship mein ho, aur woh bhi relationship mein hain

Situation yeh bhi ho sakti hai ki aap bhi relationship mein ho aur woh bhi relationship mein hain aur uske bawajood bhi aap dono ek doosre se attract ho rahe ho, aur attach hone lage ho. Ek hi workplace mein kaam karte-karte, ek saath time spend karte-karte aap dono ko hi ek doosre ke liye positive feel hone laga hai, ek doosre ke liye feelings develop hone lagi hain. Lekin, aap dono hi committed ho pehle se aur aap ab confused ho rahe ho ki aapko kya karna chahiye aisi situation mein.

Dekho, jaisa ki pehle bhi bataya gaya aur discuss kiya gaya hai, feelings par humara bas nahi chalta, khaas kar tab jab shuruwaat ho rahi hoti hai. Hume pata nahi chalta kab hum ek naye insaan ki ore khiche chale ja rahe hain, yeh pata hone ke bawajood bhi ki hum pehle se hi committed hain aur humara achha khaasa relationship hai, humara partner hum par kaafi trust karta hai, humari hasti-khelti family hai. Par yeh toh mauke ki baat hoti hai jo hum itna sab kuch hone ke bawajood bhi ek naye insaan ki ore khiche chale jaate hain, ya kayi baar woh shaqs humein apne paas kheech leta hai.

Dekho, feelings aana natural hota hai, kayi baar hum behek jaate hain, log humein apni meethi-meethi baaton mein fasa lete hain, kayi baar log humein lalach de dete hain kisi cheez ka, personal or professional life se related. Aur hum galti kar baithte hain, fir humein samajh nahi aata hai ki kya sahi hai aur kya galat.

Agar inme se koi ek reason aapka bhi hai, agar koi wajah hai yeh galti karne ki ya jaane-anjaane mein yeh ho raha hai, toh aise mein aap sambhal jao toh hi achha hai. Kyunki chahe koi bhi wajah ho, aap apne partner, apni family ko cheat nahi kar sakte, unhein dhokha nahi de sakte. Aap dono hi relationship mein ho aur dono hi yeh nahi samajh pa rahe ki ek saath char zindagiyan barbaad ho jayengi agar aap ne aaj, abhi, isi waqt apne aap ko roka nahi.

Aapko khudko bhi aur unhein bhi rokna hoga taaki aage chal ke problems khadi na ho jayein. Duniya mein yeh galtiyan kayi log karte hain aur anjaam hamesha bure hi hote hain. Kyunki, kabhi na kabhi yeh baatein khul hi jaati hain aur jab khulti hain, tab parivaar ke parivaar tabaah ho jaate hain, khaas kar un logon ke jo shaadi-shuda hain.

Agar aap shaadi-shuda nahi bhi ho, tab bhi aapko apne partner ke saath dhokha bilkul nahi karna chahiye, woh shaqs aap se itna pyaar karta hai, itna bharosa karta hai aap par, aur aap uske bharose ko yuhin nahi tod sakte aise hi kisi reason ki wajah se. Agar aapko lagta hai ki aapko yeh relationship banane mein kuch fayda hai, tab bhi aise kisi fayde ke peeche mat bhago jisme aapko apne partner ke bharose ko hi dao par lagana pade. Itna sasta nahi hota kisi shaqs ka vishwaas.

Apni aankhein kholo aur roko khudko. Kayi baar insaan overthinking karta hai aisi situation mein, toh kayi baar bina overthinking ya zara sa bhi thought diye galat decision le leta hai aur barbaad kar deta hai khudko bhi, apne relationship ko bhi, aur apni family ko bhi.

Aapke mann mein feelings aa rahi hain toh unhein control karo, unhe grow karne se roko, sahi aur galat mein hamesha sahi ko chuno, galat ko nahi. Phir chahe ‘sahi’ kitna hi mushkil kyun na ho. Aur agar samne wala shaqs aapke saath zabardasti kar raha ho relationship mein aane ke liye, khud committed hokar bhi, toh bhi usey samjhao, kyunki samjhane se bhi baat ban jaati hai. Usey realize karana zaroori hai ki woh jo bhi kar raha hai, woh galat hai, aur aap khud bhi realize karo ki aap jo bhi kar rahe ho, woh bilkul galat hai aur issey bahut logon ki life spoil ho jayegi, aur saath hi saath bharosa bhi tootega.

Yeh anjaane mein nahi, jaankar kisi ko dhokha dene wali baat ho gayi, yeh anjaane mein nahi hua hai, aur na hi isey samjho. Abhi bhi waqt hai, khud ko sambhal lo aur samne wale shaqs ko bhi samjha do. Dheere-dheere baat karna band karo aur usey apni zindagi se door kardo.

Bhale hi isme waqt lagega, lekin aakhir mein sab theek hoga, aur aapse aur ussey ek bahut badi galti hote-hote reh jayegi. Kayi logon ke dil tootne se bachenge, unka bharosa tootne se bachega. Jo feelings grow ho gayi hain, woh ek na ek din shaant ho jayengi, lekin isey badhava mat do.

Zyada confused mat ho ki kya karun aur kya nahi. Agar chahte ho ki zindagi sahi tarah chalti rahe, toh peeche hat jao aise shaqs se jiske liye aap ya aapke liye jisko feelings aa rahi hain. Waqt do, khud ko bhi sambhalne ka aur doosre shaqs ko bhi sambhalne ka, sab theek ho jayega. Mushkilein zaroor ayengi, lekin sab theek ho jayega.

Jab aap career-oriented ho

Career-oriented hona aur saath hi saath kisi ke liye feelings develop kar lena, aur apne goals se distract ho jaana, yeh bhi ek bahut badi problem hoti hai. Aap pura dhyaan lagana chahte ho apni padhai par, apne career par, aap grow karna chahte ho, din-raat successful hone ke khwaab dekhte ho, aur uske bawajood bhi workplace par kaam kar rahe doosre shaqs se aapki aankhein lad jaati hain aur aap usey—ya woh aapko—pasand karne lagte ho.

Hum overthinking tab karte hain jab hum khud ko apne goal se distract hote dekhte hain, jab hum yeh dekhte hain ki humara focus ab kaam se hatke us shaqs ki ore ja raha hai, humari performance bahut kharaab hoti ja rahi hai, humara dhyaan hatta ja raha hai, aur hum chahkar bhi samajh nahi pa rahe hain ki aakhir kaise hum wapas apna dhyaan apne career par lagayein, in relationships se door ho sakein aur apne sapnon ko pura kar sakein.

Dekho, sab mindset ka khel hai. Agar aap apne mind mein yeh baat set kar lo ki aapko sirf apne goals par dhyaan dena hai, sirf apne career par dhyaan dena hai, toh kisi bhi haal mein aap in sab chakkaron mein nahi padh sakogey. Focus karne ke liye ek strong mindset chahiye, aur sach kahun toh successful hone ke liye bhi ek strong mindset, ek dedication chahiye hota hai, ek zid honi chahiye apni manzil ko haansil karne ki.

Us zid ko pura karne wale bhi aap hi ho, koi aur nahi karega aap ke hisse ki mehnat. Isliye, agar aap us insaan ki ore khich rahe ho ya woh insaan aapko apni ore kheech raha hai toh aapko khud ko rokna hoga aur rokne ke liye aapko us insaan ko avoid karna hoga. Agar woh insaan aas-paas hai tab bhi aapko khudko aisa banana hoga ki aap usko avoid kar sako.

Jitna kam miloge, jitni kam baatein karoge, jitna kam uske saath rahoge, utna zyada ussey door bhi hoge. Waqt dena hota hai apne aap ko, kyunki kisi se bhi door hum raaton-raat nahi hote. Agar aap pure dedication ke saath koshish kar rahe ho toh thode din lag sakte hain, kuch hafte lag sakte hain ussey apne aap ko door karne mein. Aur agar woh shaqs aap ka mind distract karta hai, toh aapko usey bahut kayede se yeh baat samjhani hogi ki aap relationship mein na aa sakte ho aur na hi aana chahte ho, aapki priority hamesha se career thi aur hamesha career hi rahegi. Na aise insaan se zyada dosti karo, aur na hi zyada baatein.

Kabhi-kabhi log peeche bhi padh jaate hain jab unki feelings strong hoti hain, tab bhi aapko us shaqs ko is baat ka ehsaas dilana hi padega ki aap uske dil ko todna nahi chahte, usko apnane ke baad usko woh importance na dekar jo woh deserve karte hain. Aap uski feelings ke saath khilvaad nahi karna chahte.

Isi tarah se aap usey samjhao aur koshish karte raho jab tak woh samajh na jayein. Lekin aap kisi behkaave mein mat aana, kyunki agar aap ke liye aapka career important hai toh hamesha rahega, usey badlo mat kisi bhi keemat par.

Usko samjhane ke saath-saath khud ko bhi samjhao ki jo bhi aapne socha hai karne ki, jo bhi aapko achieve karna hai life mein, uske saath aap kisi bhi haalat mein compromise nahi karoge, na hi kisi ko beech mein aane doge, aur na khud kisi ki ore badhoge. Jab life mein successful ho jaogey, uske baad chahe kisi ki taraf dhyan dena, lekin tab tak sirf aur sirf apne goal pe dhyan dena hai, aur kuch nahi.

Humare safar mein utaar-chadhaav toh bahut aate hain, kayi baar hum distract bhi hote hain, lekin aakhir mein humein us safar ko chhodna nahi hai, beech mein khatam nahi karna hai. Usey humein aage tak lekar jaana hai jab tak humein humari manzil nahi mil jaati.

Main jaanta hoon yeh asaan nahi hota, par sach toh yahi hai ki kamyabi asaani se nahi milti, uske liye apne aap ko pura jhokna padta hai, tapaana padta hai mehnat ki aag mein, aur jitni bhi pareshaaniyan aati hain, chahe kisi bhi roop mein aayein, unhein hatana padta hai apne raaste se. Tab ja kar insaan kamyaab banta hai.

Lekin, is sab ke bawajood bhi aapko lagta hai ki aap bahut zyada hi attached ho gaye ho ya woh ho gaye hain aap se, toh aap is relationship ko bhi ek mauka de sakte ho. Isme koi shaq nahi hai ki rishton ko samay dena padta hai, lekin agar aapko lagta hai ki aap is rishte ko bhi samay de sakte ho aur saamne wala shaqs bhi aapki madad kar raha hai aapko aapki manzil tak pahuchane ke liye, toh aap zaroor ek mauka de sakte ho.

Waise toh ye decision aap ka hoga, kyunki aapko decide karna hai ki akele manzil tak pahuchna hai ya kisi insaan ke saath. Agar aapko aisa nahi lagta ki woh insaan aapka zyada dhyaan kheech raha hai aur aap focus nahi kar pa rahe ho apne career par, toh aap usey samjha sakte ho, aur agar samjhane par bhi nahi samajh rahe, toh aise mein uske saath relationship mein mat aao.

Bina understanding ke na aise insaan ke saath relationship mein ana, aur khaas kar tab toh bilkul nahi jab aapka career down hota ja raha hai sirf us relationship ki wajah se. Thodi samajhdaari se faisla lo, soch-samajh kar faisla lo, na kisi ke dabaav mein aakar, aur na hi zyada emotional ho kar.

Work-life balance kar sakte ho, vishwaas hai khud par aur apne partner par toh hi unke saath relationship mein aane ka faisla lena, warrna nahi, kahin aisa na ho jaaye ki aap josh-josh mein haan kar do, ya unke dabaav mein aa kar haan kar do, aur baad mein aapse na apni relationship sambhali jayegi aur na hi apna career.

Ladkiyon ke Saath Sexual Harassment

College khatam hote hi humare career ko ek nayi shuruwaat milti hai. College mein jitna padhte the, jitna sunte aur dekhte the jobs ke baare mein, woh ab haqeeqat hone wala hai. Jab bhi baat jobs ki aati hai, hum kabhi unko lekar negative nahi hote. Humesha ek achhi job ke baare mein sochte hain, ek achhe working environment ke baare mein sochte hain.

Lekin kayi baar jaisa humne socha tha, waisa hota nahi hai. Baat chahe badi companies ya workplaces ki karlo ya fir kisi start-up ya choti company ki. Kabhi na kabhi humare saath aisa koi na koi hadsa ho jaata hai jiska humare dimaag par bahut gehra asar padta hai.

Kisi colleague ka aapko galat nigaah se dekhna, ya galat niyat se aapko touch karna, aise issues bahut aam ho chuke hain. Lag-bhag har ladki apni zindagi mein is tarah ki cheezein face karti hai, aur kayi toh bahut kam umr mein hi is tarah ki cheezon ko face karti hain, us umr mein jab is sab ke baare mein koi knowledge bhi nahi hoti hai.

Bahut si ladkiyon ke saath jab unki job ke dauraan sexual harassment hota hai toh woh ignore kar deti hain yeh soch kar ki ya toh issey jaane-anjaane mein ho gaya, ya shayad apne aap sudhar jayega, ya fir agar iske khilaaf awaaz uthayi toh uski naukri bhi ja sakti hai aur samaaj mein khud ki badnaami bhi ho sakti hai.

Aur kayi baar agar koi ladki awaaz utha bhi leti hai toh ya toh uski awaaz ko dhamkiyon ke zariye daba diya jaata hai ya usko galat proof kar diya jaata hai. Isi wajah se bahut si ladkiyan avoid karti hain sexual harassment ke khilaaf awaaz uthana.

Agar aap bhi kahin kisi company mein job karti hain aur aapko kisi ne sexually harass kiya hai toh aap ghabraiye mat. Aapke saath jo bhi hua hai ussey aap apna confidence lose mat kariye aur na hi aisa sochiye ki aap is baat ko ignore kar dengi. Nahi, aapke mann mein agar aisa khayaal aa raha hai ki aapko sexual harassment jaise crime ko ignore karna chahiye toh aap bilkul galat soch rahi hain.

Agar aap puri tarah se sure hain ki jo bhi hua hai woh jane anjaane mein nahi ya ek accident nahi balki jaanboojh kar kisi ne aapke saath badtameezi ki hai, aapko harass karne ki koshish kari hai toh iske khilaaf awaaz zaroor uthaiye, fir chahe uska anjaam kaisa bhi ho.

Agar aap yeh sochengi ki kisi ki zindagi barbaad ho jayegi ya kisi ko job se nikaal diya jayega, toh is baat ko aap bhi samajh lijiye ki agar aapne aise shaqs ke khilaaf awaaz nahi uthayi toh aaj jo aapke saath hua hai, woh kal ko kisi aur ke saath hoga, kyunki uske andar himmat aa jayegi. Usey lagega ki ladkiyan kamzor hoti hain aur uski fir himmat banegi kisi aur ladki ko sexually harass karne ki.

Toh yeh sirf aap apne liye nahi karne ja rahi hain, yeh aap un sabhi ladkiyon ke liye karne ja rahi hain jo aaye din sexually harass hoti hain. Galat ke khilaaf awaaz uthane se aap galat nahi ho jayengi. Aise log jo ladiyon ko ek soft target samajhte hain, ek object samajhte hain, jiske saath woh kaise bhi chhed-chhad kar sakte hain, unhein zaroor saza milni chahiye. Inko chhod dena sexual harassment ko badhava dena hota hai.

Aap sabse pehle toh kisi senior authority se complaint kariye aur puri situation sachchai ke saath define kariye ki kaise hua kya hua, aur bejhijhak hokar sab kuch bataiye. Agar is beech koi aapko samjhauta karne ke liye bhi kahe toh bilkul mat kariye. Sexual harassment jaise cases mein companies ka naam badnaam na ho isliye woh baat ko dabane ki koshish karte hain, aur kuch bhi offer karke compromise karvate hain.

Aap kisi bhi keemat par compromise mat karna. Har company mein grievance department hota hai jahan par aap complaint kar sakte hain agar aapke saath koi bhi unfair activity ya crime hua hai. Wahan report zaroor karein aur uske baad jo bhi investigation ho, usme contribute karein aur himmat ke saath aage badhte rahein.

Kayi baar investigation se bachne ke liye ladkiyan pehle hi peeche hat jaati hain yeh soch kar ki kaun in sab mein padega. Agar aapko lagta hai ki aap aisa karke sahi kar rahi hain toh aisa bilkul nahi hai. Agar aapko is tarah ki problems face karni bhi pad jayein toh koi burai nahi hai. Aapki thodi si problems at least aise crime ko kam karne mein madad kar bhi rahi hain toh isme kya burai hai?

Jab bhi ek ladki sexually harassed hoti hai, uske dil aur dimaag par gehra asar padta hai, woh bahut darr jaati hai aur ghabrane lagti hai. Is tarah ke incidents bahut gehra asar chhodte hain ek ladki ke dimaag par, kyunki koi bhi ladki na hi kabhi unwanted touch bhulti hai aur na hi galat nigaahein.

Lekin aapko aisi situation mein darna nahi hai, balki bahut hi zyada himmat se kaam lena hai. Aap kamzor nahi hain aur na hi khud ko kamzor samjho. Ladkiyon ke khilaaf badhte crimes kahin na kahin har ladki ke mann mein insecurity paida kar rahe hain aur unhein yeh feeling aani shuru ho gayi hai ki unke liye is society mein rehna bilkul safe nahi hai, jo ki kahin na kahin sach hai.

Par humein waqt ke saath saath aur zamane ke saath saath khud ko dhaal lena chahiye. Agar zamana keh raha hai ki strong bano warna peeche reh jaogey, toh aapko waqt ke saath saath na hi sirf physically, balki mentally bhi strong hona padega. Yeh shayad dobara ho aapke saath, aaj is company mein toh kal kisi aur company mein. Is tarah ki situation ko handle karna ab aa jaana chahiye aap ko, aur kisi bhi tarah ke consequences kyun na ho, apni awaaz ko dabne bilkul mat dena.

Working environment mein hamesha ek distance bana ke rakho unse jo bhi aapke saath work kar rahe hain, khaas kar males. Kyunki harassment sirf unknowns ke saath nahi hota. Kayi baar log baatein kar-kar ke kareeb aate hain, dosti karne ki koshish karte hain aur phir apne maqsad ko anjaam dete hain. Aapne socha bhi nahi hota hai aur aise log aapke saath badtameezi kar jaate hain. Shayad aise bhi log jin par aap bahut zyada bharosa karne lage hain.

Blind trust aaj ke zamane mein kisi par bhi nahi kar sakte. Ek doori hamesha bani rehni chahiye aap mein aur saamne wale shaqs mein. Koi zabardasti kareeb aata dikhe toh usey door se hi warn kar do. Warn karna bhi zaroori hai taaki usko pehle hi andaaza ho jaaye ki aage badhna matlab musibat ko gale laga lena hai. Aur agar uske baad bhi koi zabardasti karta hai aapke saath toh usey zaroor is baat ka ehsaas dila dein ki kisi ladki ke saath chedkhani karne ka anjaam kya hota hai.

Sherni ho aap, bheegi billi nahi. Aap chaho toh apni dahaad se zamana hila sakti ho. Agar naubat aa jaye aisa karne ki, toh peeche mat hona, aur agar ho bhi rahi ho, toh jhapatta maarne ke liye, na ki wahan se bhaagne ke liye.

Overthinking kisi bhi tarah ki situation mein hone lagti hai jab humein us cheez se fark padta hai, lekin agar sochne wale hum hain, toh khud ko shaant karne wale bhi hum hi hain. Aisi situation mein bhi agar kuch soch rahe ho toh apne dimaag ko thanda karo, aur apne bhagwan par bharosa rakho. Problems agar aayi hain toh saath mein solution bhi laati hain, us solution ko use karo aur apne dimaag ko shaant rakhne ki koshish karo.

Kisi bhi tarah ke self-doubt mein mat jao, chahe koi aapko support kare ya na kare, aap akele kar sakti ho, aapko zaroorat nahi hai kisi ke saath ki. Aur is sabke bawajood bhi aapko aisa lagta hai ki aap shaant nahi ho pa rahi ho, ya thodi der ke liye hoti ho aur phir se sochne lagti ho, toh apne aapko waqt do, waqt ke saath-saath sab thik ho jaata hai.

Agar koi hai aas paas jis par aapko bharosa ho, jo aapko sun aur samajh sakta hai, jo aapko judge na kare, uske saath share karo. Share karne se mann bahut halka hota hai. Koi dost, ya family mein koi jis par aapko itna bharosa ho ki woh saath denge ya judge nahi karenge, unke saath share kariye, ya koi shaqs jiske saath aap relationship mein hain, unke saath share kariye, aapke mann ko shaanti milegi.

Agar aap chahein toh mere session ke zariye bhi aap apni baat keh sakti hain. Meri website anubhavagrawal.com par mere Let’s Talk Sessions available hain, aap wahan se book karke mujhse baat kar sakti hain.

Bas, sabse zyada zaroori khud ko waqt dena hai, kyunki, kabhi kabhi koi problem aati hai toh, woh humari marzi se nahi jaati, woh jitni der rehti hai, uska asar humare dil aur dimaag par hota hai, aur usey hum rokne ki koshish kar sakte hain par, kabhi kabhi woh chalti rehti hai saath saath, aur jab uska waqt aata hai jaane ka, toh woh chali bhi jaati hai, isliye bas ab relax karo.

Work Pressure

Kaam ka pressure toh ek aisi cheez hoti hai jo humari rozana ki zindagi mein chalti rehti hai. Koi bhi job ho, chahe woh kisi bhi field ki ho, ya khud ki business hi kyun na ho, har kaam mein aapke upar pressure hota hai us kaam ko finish karne ka. .

Har kaam mein aapke upar pressure hota hai task complete karne ka, grow karne ka, successful hone ka, aur kayi baar ye pressure humein pareshan kar deta hai. Kabhi toh thoda sa pressure hota hai, toh kayi baar situations itni critical ho jaati hain ki, aap depression mein jaane lagte hain, aur aapki tabiyat bhi kharab hone lagti hai.

Tension ek aisi jad hai, jo bahut si bimaariyon ko bulawa de deti hai, phir chahe woh depression ho, high blood pressure ho, ya phir koi aur. Kaam ki tension humare career ki shuruwaat hote hi humare saath chalne lagti hai aur zindagi ki aakhri saans tak, khaas kar tab tak jab tak aap kaam karte hain, tab tak chalti rehti hai. Ek khatam hoti hai, toh doosri aa jaati hai.

Kabhi growth ki tension toh kabhi kaam time par finish karne ki tension, aur yeh tension humare kaam ko sudharne ki jagah ulta bigadne lagti hai. Hum achha kaam shaant dimaag se hi kar paate hain aur jab humara dimaag shaant nahi hota toh, humare achhe bhale kaam bhi bigadne lagte hain aur hum ya toh apne boss/client ki daant sunte hain, ya relations kharab kar lete hain, aur is sab ka affect sirf aapke dimaag par nahi padta, balki aapki pocket par bhi padta hai.

Zaahir si baat hai, jab hum kaam karenge nahi toh humari salary bhi kategi, aur humari income bhi kam hogi, aur yeh tension insaan ko andar hi andar aur bhi zyada khaane lagti hai. Family ki responsibility ho ya apne career aur apne finances ko stable karne ki tension, aksar hum bahut zyada pareshan ho jaate hain rupay paise ko lekar. Khair, baat yeh hai ki, work pressure humare dimaag ko bahut zyada disturb kar deta hai aur hum us situation se jitna zyada bahar nikalne ki koshish karein, aisa lagta hai jaise yeh sab endless hota ja raha hai.

Aksar kehte hain, ‘Jaan hai, toh jahaan hai.’ Agar aapki health sahi hai, toh aap zindagi mein kisi bhi pareshani se guzar jayenge, chahein woh kaisi bhi situation aaye, rupay paiso ko lekar ho ya phir job ka pressure. Ek seedhi sachchi si baat hai, agar koi shaqs aapko kisi kaam ko karne ke liye pay kar raha hai, toh woh aap par pressure banayega kaam ka taaki aap kam se kam samay mein zyada se zyada kaam kar sakein aur apne skills ko aur bhi zyada enhance kar sakein.

Life mein kisi bhi tarah ki problems aayein, toh unhey ek challenge ki tarah lo, kyunki agar us kaam ko itni asaani se kar liya jaaye, ya kisi job mein koi target ya pressure na ho toh, aap apne andar improvement kaise layenge? Aap apni life mein grow kaise karenge? Bina challenges ke growth nahi milti. Bahut zyada taraashna padta hai khud ko apne aap mein chamak laane ke liye. Bina taraashe toh heere ki bhi chamak kuch nahi hoti. Heere ko taraashna padta hai usko aur bhi zyada khubsoorat banane ke liye, aur bhi zyada chamkaane ke liye.

Jitna zyada time aap yeh sochne mein waste karogey ki, kaise hoga, hoga ke nahi hoga, ya agar nahi hua toh kya hoga, job chhut jayegi, berozgaar ho jaunga, career khatam ho jayega, agar yeh sab sochne se behtar aap us kaam ko karna shuru karo, toh kahin ke kahin pahuchoge.

Jo kaam aaj adhura lag raha hai, woh karne se hi toh pura hoga na. Itni tension lekar, itni overthinking kar ke kaam karogey toh, aapke kaam mein na hi khubsurti hogi aur na hi accuracy. Kaam ko achhe se karne ke liye sahi jagah dimaag lagaya jaata hai aur thanda dimaag lagaya jaata hai, garam dimaag se kaam keval bigadte hain.

Agar business bhi hai tab bhi, apne upar itna pressure mat banao, aur agar pressure bana bhi rahe ho jaldi grow karne ke liye, kam samay mein zyada unche mukaam par pahuchne ke liye toh, us pressure ko depression mein mat badlo. Pressure hota hai, lekin aap us pressure ko negatively le rahe ho ya positively, yeh aap ke upar depend karta hai.

Successful banne ka koi shortcut nahi hota, phir woh chahein job mein success paana ho ya phir business mein. Successful banne ke liye saalo ki mehnat lagti hai, lagan lagti hai, kaafi saare sacrifices karne padte hain, apna zyada se zyada time dena padta hai, lekin humein yeh samajhne ki bhi zaroorat hai ki, apni work life ke saath saath personal life bhi balance kar ke chalni hai.

Apne kaam ko 24*7 nahi de sakte, aur woh aapki mental health ke liye thik bhi nahi hai. Aap din ke jitne bhi samay kaam karte hain, utne samay kuch aur na kar ke sirf kaam par focus karein aur sirf kaam ko 100% dein, toh aapko yeh pressure itna feel nahi hoga.

Work pressure humari capabilities ko, humari limits ko kholta hai, unhein aur bhi zyada badhata hai taaki hum achhe se aur bhi zyada mehnat karein, isko itna negatively mat lo. Agar duniya mein naam kamana hai, apni society mein uncha mukaam pana hai, toh mehnat bhi baaki logon se alag aur zyada karni hogi, extraordinary banne ke liye mehnat bhi extraordinary karni padti hai.

Lekin chinta ki koi baat nahi hai, dheere dheere in baaton ko seekh logey, apne kaam se seekhogey, usmein experience gain karogey, toh definitely aap apni haisiyat se zyada mehnat karogey aur ek din successful zaroor banogey.

Successful sirf insaan paiso se nahi hota, izzat se bhi hota hai, toh yeh mat sochna ki zyada paise kamana hi successful hona hai, jab mehnat karte hain toh, paise toh aa hi jaate hain, lekin uske saath saath izzat kamana bhi, society aur environment ka dhyaan rakhna bhi, apne se neeche ke logon ki madad karte hue chalna, aur imandari se chalna bhi zaroori hai, kyunki, insaan ki sabse badi wealth uski pehchaan, uski personality hoti hai.

Work pressure jab tak itna hai ki, aap jhel sakte hain, tab tak toh thik hai, lekin agar aapko aisa lagta hai ki, aap kaam ki kuch zyada hi tension lene lage hain, ya pressure bahut zyada banaya ja raha hai aap par, toh aap kuch din ke liye kaam se chutti le lo. Kuch waqt khud ke saath, family ke saath aur doston ke saath guzarna bhi zaroori hai, aap pure time kaam ke baare mein sochte rahogey toh, wakayi mein dimaagi roop se bimaar padne lagogey. Khud ko aur activities mein involve karo, doston ke saath baat karo, unke saath baitho, family ke saath baitho, aur unse baat cheet karte raho. Jo bhi problem chal rahi hai life mein, usey share karte raho apno ke saath.

Agar job kar rahe ho aur aapke upar unbearable pressure banaya ja raha hai, aur aapko lagta hai ki, aap job chhod sakte ho ya switch kar sakte ho, toh zaroor karo. Kuch companies apne employees ko bahut buri tarah treat karti hain aur aise mein aapki health aapki job se zyada zaroori hai. Job doosri bhi mil jayegi, lekin, zindagi ek hi hai, dimaag bhi ek hi hai, agar in par asar pada toh, job karne ki halat mein nahi bachogey.

Kuch waqt struggle karna padega toh kar lena, lekin, ek aise working environment mein raho jahan par aap peacefully kaam kar sakte ho, jahan ka environment physically bhi or mentally bhi safe aur peaceful ho.

Phir se yaad dilana chahunga, “Jaan hai, toh jahaan hai.” Aapki family bhi aapko khona afford nahi kar sakti aur na hi aapko bimaar dekhna. Isliye jinke liye itni mehnat kar rahe ho, agar itna sab kuch kar ke woh aakhiri mein pareshan hi hone hain, toh kya fayda?

Isliye, job ko chhod dena hamesha ek option hai aur aage bhi rahega. Job chhodne ke baare mein sirf tab socho jab lage ki aapne apna 1000% de diya, lekin, uske baad bhi aap depressed feel kar rahe ho us company mein. Aisa na ho ki, aap mehnat se bachne ke liye aur comfort zone ko dhundne ke liye job switch karne ke baare mein soch rahe ho.

Mehnat karna apni jagah hai aur tortured hona apni jagah hai. Utni mehnat karo aur tab tak karo jab tak yeh sab aapko ek torture na lage. Zyada pareshan mat ho, thande dimaag se socho, kuch samajhdaar logon se discuss karo aur phir decision lo. Aur haan, waqt dena khud ko, bhale hi thoda time lage ek nayi shuruwaat karne mein, par aakhir mein sab theek zaroor ho jayega.

Aur intezaar nahi kiya jaata thik hone ka, khud aise faisle lene padte hain jo humein aisi musibato se bahar nikalein aur ek achhi aur sukoon bhari zindagi de sakein. Kisi bhi field mein struggle bahut hota hai, kisi bhi work mein struggle bahut hota hai, utna pressure lo jitna aapki capability hai.

Toxic Work Culture

Jab bhi humari job lagti hai, humari khushiyan saatve asmaan par pahuch jaati hain. Matlab aisa lagta hai ki zindagi ki ek nayi shuruwaat ho gayi ho jaise. Life mein positivity aati hai ki aap apne pairon par khade hue hain, ab aap jo chahe wo le sakte hain, apne parents ke liye kuch kar sakte hain. Achanak se aisa lagne lagta hai ki ab aap apne tareeke se jee sakte hain, khud ke paison se.

Har koi expect karta hai apne job se ki usey woh kaafi zyada grow karne mein help kare, usey kuch sikhaye, personality development ho, confidence badhe, skills enhance hoyein, aur bhi bahut kuch.

Kisi bhi workplace ya company ko join karne se pehle hum itna dhyaan nahi dete ki andar ka environment kaisa hoga aur kaisa nahi, kisi field ki kisi company ke baare mein thoda bahut suna hota hai ki, haan achhi company hai, achhe fayede deti hai, achha package mil jaata hai, khaas kar woh sab kuch jo humein chahiye hota hai, uske lalach mein hum chale toh jaate hain, par cheezein har baar waisi nahi rehti jaisi hum umeed karte hain.

Humare join karne ke baad hum khush toh bahut hote hain, lekin jaise hi hum andar kadam rakhte hain, logon ko dekhte hain, unse baat karte hain, humein kayi baar negative vibes aati hain. Lekin, kayi baar hum kaafi der baad samajh paate hain ki andar ka mahaul kaisa hai.

Sabse pehle baat karte hain ki aakhir toxic work culture hota kya hai?

Toxic work culture woh hota hai jahan par ek shaqs ko workplace mein mentally torture kiya jaata hai, physically ya verbally abuse kiya jaata hai, uspe bahut zyada pressure banaya jaata hai kaam ka aur agar woh nahi hota toh usey bahut zyada abuse sunni padti hain apne managers se.

Verbal ke saath saath physical abuse aur sexual harassment bhi hoti hai aisi companies mein. Aisa sirf aapke saath nahi, wahan pe maujud har employee ke saath hota hai jiski wajah se wahan ka mahaul bahut hi zyada depressing, demotivating aur toxic ho jaata hai.

Toxic work culture humari mental health ko bahut zyada affect karta hai. Hum depressed ho jaate hain yeh soch-soch kar ki kaise us jagah par har roz subah uthkar jayein, kaise woh kaam karein jo humein pasand nahi, kaise survive karein us jagah par jahan dum ghut ta hai, kaise wahan ke colleagues ka saamna karein jinhein hum pasand nahi karte.

Humein aisa lagne lagta hai ki kaam karna humari majboori hai, khaas kar woh log jo bahut zyada zimmedariyon ke neeche dabe rehte hain, chahe woh ghar chalana ho ya family ko support karna. Agar job chhodi toh paisa aana band ho jayega aur kharche nahi chal payenge, bahut tension hone lagti hai aur kayi baar depression mein chale jaate hain hum.

Dekho, bechain hone ki, pareshan hone ki, ya zarurat se zyada tension lene ki zaroorat nahi hai. Agar koi company hai jo aapko nahi pasand aayi aur aap ussey nikalna chahte hain, boss ke taane sunte-sunte pareshan ho rahe hain, dum ghut raha hai wahan toh ye socho ki aksar cheezein humari umeed se kayi guna zyada ghatiya nikal jaati hain, isko soch-soch kar pareshan mat ho.

Kisi aur company mein apply karna shuru karo, interviews dena shuru karo. Chahe toh us company mein job karte-karte aisa karo, nahi toh us job se chutti le kar aisa kar sakte ho. Aur agar chutti nahi mil rahi hai aur mahaul kuch zyada hi kharaab aur pechida hota ja raha hai toh aap bina koi resignation diye chhod do. Usey chhod ke apne ghar baitho kuch waqt, apni family ke saath time spend karo, apne doston ke saath time spend karo aur agar kisi ke saath nahi karna chahte toh khud ke saath karo, kuch waqt tak akele raho, aur khud ko samay do.

Toxic work culture sirf dimaag par hi asar nahi daalta, balki humare confidence ko bhi kam kar deta hai. Humari relationships mein bhi uska asar padta hai. Hum bahut zyada fikar karne lagte hain, humari himmat tootti hai. Jo log zyada sensitive hote hain unhein anxiety hone lagti hai office ke naam par. Apne aap ko, apne dimaag ko itna zyada load mat do aur itni tension mat lo. Jaan rahegi toh sab kuch haasil kar logey, ek nayi koshish kar logey. Lekin agar jaan nahi rahi toh sab khatam.

Is jagah par khud ko fasa hua mat samjho. Nahi! Aisa bilkul bhi nahi hai, apna future kisi ko pata nahi hota, kuch aapki kismat thi toh kuch aapki laparwahi. Aajkal har company ke baare mein internet par reviews zaroor hote hain, wahan ke ex-employees post karte hain ki wahan ka environment kaisa hai, kaam kaisa hai, aur pressure kitna rehta hai, etc.

Kisi bhi company ko join karne se pehle uske baare mein research kar leni chahiye, taaki agar koi cheez aapko dikh nahi rahi hai ya pata nahi hai, toh uske baare mein pehle se pata chal jayega.

Agar sab kuch sahi lage par uske baad bhi sab gadbad ho jaaye, toh bina pareshan hue wahan se chup-chaap nikal jao aur kahin aur try karo, kisi aur company mein apna resume bhejo. Bhale hi thoda gap ho jayega, ya thode paise kam zyada milenge, lekin dimaag aur mann mein shanti rahegi aur bewajah overthinking nahi karoge.

Aisa culture aapki growth ko rokta hai aur aapko life aur jobs ka ek bahut hi negative perspective deta hai, jiski wajah se aap bahut hi low feel karne lagte ho. Isiliye kabhi bhi aisi organizations mein zyada waqt tak nahi theherna chahiye. Bahut si opportunities mil jayengi, thoda waqt lagega kahin aur settle hone mein, kisi aur jagah shuruwaat karne mein, lekin woh waqt, aur woh mehnat, waste nahi jayegi.

Apne upar bharosa rakho, apne pyaar karne walo ke baare mein socho jinko aapki parwaah hai, jo din-raat aapki achhi sehat ki dua karte hain, jo aapko khush dekhna chahte hain. Agar aap khush nahi rahenge toh aap doosron ko bhi khush nahi rakh payenge. Aise logon ke naam par hi sahi par khud ko aisi jagah se door karo aur ek nayi shuruwaat karo.

Zyada soch-vichaar mat karo, zyada overthink mat karo, aage ke liye mehnat karo. Yahan se niklogey toh raste apne aap bante chale jayenge. Bas, khud par bharosa karne ki baat hai! Kisi bhi haal mein usey mat tootne dena.

Apni mental health ko priority banao, aur aisa mat sochna ki yeh aapke career ko affect kar dega, aisa kuch bhi nahi hoga. Aapka career apne aap track par aa jayega, chahe uske liye thoda struggle hi kyun na karna pade.

Bas, ab is baare mein overthinking karna band karo, aur khudko aisi jagah se bahar nikalne ki tayariyan shuru kar do.

Job Chhoot Jaana

Life mein agar ‘ups’ aate hain toh ‘downs’ bhi aate hain. Achha waqt aata hai toh bura waqt bhi aata hai. Par life kisi ke liye rukti hai kya? Nahi! Life na kabhi kisi ke liye rukti hai aur na hi hume give up karna chahiye.

Job ho ya business, hum is umeed mein shuru karte hain ki apna career banayenge, khub paise kamayenge, naam kamayenge aur grow karenge apne kaam mein, apni field mein.

Humari job lagti hai, achhi chalti hai aur hum positive soch ke saath aage badhte chale jaate hain ki sab sahi hoga, aur isi tarah mehnat karte hue aage badhte chale jayenge, na rukenge aur na hi peeche mudenge. Hum bahut zyada positive hote hain, khaas kar tab jab humari pehli job lagti hai.

Par kabhi kabhi jaisa hum sochte hain waisa hota nahi life mein, humari soch or umeed se badhkar kharaab ho jaati hain cheezein aur hum uske liye prepared bhi nahi hote hain. Hum kuch der ke liye bahut zyada negative ho jaate hain aur pareshan hone lagte hain us cheez ko lekar.

Job ka chhoot jaana ya business mein bada loss hona ya business band ho jana unhi badi negative cheezon mein hoti hain, jinke liye hum kabhi prepared nahi hote. Kisi bhi tarah ka mishap ho jaana job mein, ya company ki taraf se nikaal diye jaana, bilkul depression mein daal deta hai humein. Hum bahut zyada overthinking karne lagte hain, khaas kar tab jab humare upar kaafi zimmedariyan hoti hain aur humne kuch goals set karke rakhe hote hain.

Agar aapki bhi job chhoot gayi hai, wajah chahe koi bhi ho, chahe aapko nikala ho aapke kharaab performance ki wajah se, ya aapko chhodni padi ho kisi gadbad ki wajah se, ya phir company band ho gayi ho, agar aisa kuch hua hai aapke saath aur aap is baat ko lekar bahut zyada pareshan ho rahe hain toh ek baat batao.Kya aapko kabhi doosri job nahi mil sakti? Kya aap dobara mehnat aur koshish nahi kar sakte? Kya aap itni jaldi haar maan logey? Chahe career ki shuruwaat ho ya kaafi saalo ka experience ho, kisi bhi condition mein aapke andar give up karne ki feeling nahi aani chahiye.

Agar ek darwaza band hota hai, toh kayi naye darwaze khulte hain. Agar aapko lagta hai ki aapki kisi laparwahi ya us job ko achhe se perform na karne ki wajah se job chhooti hai, toh aap apne skills par work karo. Apne skills ko enhance karo, develop karo aur mehnat karo apne upar.

Agar job humari kami ki wajah se jaati hai, toh humein dukh toh bahut hota hai, lekin hum agar baithke rote rahenge, afsos karte rahenge toh ussey kuch badalne wala nahi hai. Baithke rone ya time waste karne se better hai ya toh aap us skill par work karo, us kami par work karo. Aur agar aapko aisa lagta hai ki aap ke andar capabilities hain, khasiyat hai par yeh kaam alag hai, yeh kaam aap nahi kar sakte, toh aap field ya job profile bhi switch kar sakte ho.

Kabhi-kabhi aisa hota hai ki hum khud ko explore nahi kar paate hain aur humein bahut der mein pata chalta hai ki hum kis field mein zyada behtar hain, kis kaam ko zyada achhe se perform kar sakte hain.

Agar ek shaqs writing karne mein interested hai, usey likhna pasand hai aur agar usey sales ki job mil jaaye aur woh join kar le toh woh zyada din nahi tik sakta, kyunki usey kuch bechne se zyada likhne mein maza aata hai, woh wahi kaam achhe se kar sakta hai.

Woh quotes likh sakta hai, books likh sakta hai, scripts likh sakta hai ya jis cheez mein uska interest ho woh likh sakta hai, ussey kabhi koi cheez bechi nahi jayegi, ya agar bechi bhi jaaye toh, woh us kaam ko zyada mann laga ke zyada waqt tak nahi kar sakta.

Har insaan ke andar koi na koi khoobi hoti hi hai. Uska dimaag kisi ek jagah chalta hai, usko kisi ek kaam mein interest hota hai. Agar aap apne passion ko follow karoge, ya apne us interest ko aur zyada explore karoge toh aapko aapke career mein zyada achhi growth milegi aur aap dil se khush bhi rahogey. Bhale hi thode kam paise kamaoge shuruwaat mein, lekin, apne interest ke kaam mein insaan jaldi grow karta hai.

Agar field ki problem ki wajah se job chhooti hai toh field change karlo, kaun kya sochega aur kya nahi is baare mein aap mat socho. Jisey jo sochna hai sochne do, aap bas apne career par dhyaan do. Ghar mein har koi aapko khush dekhna chahta hai, aapko successful dekhna chahta hai, aur aap khud par vishwas karke aage badhogey toh ek na ek din zaroor successful banogey.

Agar skills ki wajah se job chhooti hai toh zaahir hai apne skills par focus karo, unhein aur bhi zyada improve karo. Chahe thoda waqt lelo, thoda gap aa jaaye jobs mein, koi baat nahi, par kam se kam jab dobara join karogey kahin toh aap us kaam ko pehle se zyada behtar tareeke se kar paoge. Apne upar vishwas rakho aur mehnat karo, aapko ek din success zaroor milegi.

Ho sakta hai kuch personal problems hone ki wajah se job chhoot gayi, jaise aapke ya kisi family member ke health issues, kisi beloved one ki death ho jaane ki wajah se depression mein chale jaana aur job chhoot jana. Agar aisi koi wajah hai aur aap tension le rahe hain job aur career ko lekar, tab bhi khudko sambhalo aur itni tension mat lo. Jo aaj chhoota hai woh kal ko phir jud sakta hai. Jobs ki kami nahi hoti, ek na ek mil hi jaati hai, ho sakta hai thoda kam package se shuruwaat karni pade, par koi baat nahi, tension mat lo, waqt ke saath-saath sab kuch thik ho jayega.

Aapka mentally strong rehna bahut zaroori hai. Apne aap ko itna negative mat hone diya karo, zyada negative sochte ho isliye pareshaniyan hoti hain. Kuch bura hota hai toh kuch achha bhi hoga, thoda gap aa jaaye toh koi baat nahi, par dobara track par wapas zaroor aa jaoge. Agar aap ke saath health issues hain toh koi baat nahi, health bhi toh bahut zaroori hai, bina health ke kaisa career? Zindagi rahegi toh sab kuch kar lenge, chahe phir se shuruwaat hi kyun na karni pade. Lekin itna overthinking mat karo career ko lekar. Ek baar health thik ho gayi toh wapas track par aa jayengi cheezein.

Aur agar company mein kuch problems hone ki wajah se job chhooti hai toh befikar raho. Har company ke competitors hote hain, aap wahan try karo, thode interviews do, thoda wait karo, jo dagmagaye ho aaj aur sambhalne mein waqt lag bhi raha hai toh koi baat nahi, har cheez ka ek waqt hota hai, na woh waqt se pehle hoti hai, aur na baad mein. Toh intezaar karo aur apni koshish jaari rakho, aise mein sabr bahut zaroori hai.

Zyada tension mein aane se kuch nahi badlega. Har cheez ke liye prepared rehna chahiye insaan ko, chahe achha ho ya phir bura. Jo achha hua hai toh bura bhi hoga, aur bura hua hai toh achha bhi hoga, achhai aur burai toh saari zindagi sang chalti rahegi, yeh kabhi alag nahi hongi humse.

Aur companies mein try karo, koi na koi teer sahi jagah zaroor lagega, bas overthinking kar-kar ke apna mindf**k mat karo. Dimaagi roop se sahi rahogey, toh sab pareshaaniyon se bahar nikalte chale jaoge. Isliye overthinking ko maro taala aur zindagi ke challenges ko accept karna shuru karo. Main dua karunga ki aapko jald se jald ek achhi job mile aur aap zindagi mein khub kamyab ho.

Business Band Ho Jaana

Ab tak baat kari hai job ki. Ab baat karte hain business ki, kyunki, business ki situations alag hoti hain aur uski tensions bhi. Business aapne shuru toh bahut umeed se kiya tha, lekin kabhi-kabhi cheezein work out karti nahi hain, aur ya toh temporarily ya phir permanently businesses band ho jaati hain. Business mein loss hona, ya bahut badi problems aa jaana, ek aam baat hoti hai.

Kabhi-kabhi hum prepared hote hain badi problems ke liye, lekin kabhi-kabhi nahi bhi hote hain. Chahe aapke business ki shuruwaat ho ya phir saalon purana business ho, situations badalti rehti hain, market conditions badalti rehti hain, competitors bhi aate-jaate rehte hain aur problems bhi badhti-ghatti rehti hain.

Business mein hum invest sirf apna paisa hi nahi karte, balki time bhi karte hain, efforts bhi karte hain, mehnat bhi karte hain, mann laga ke mehnat karte hain. Par kabhi-kabhi aisi situations aa jaati hain, jab humein aur humare business ko ek zor ka jhatka lagta hai aur hum bahut zyada negative ho jaate hain, aur overthinking karne lagte hain.

Pareshan mat ho, agar yeh loss recoverable hai toh sabr rakho, phir se koshish karo, kisi naye dhang se koshish karo, kisi nayi technique se koshish karo, socho kaise bachaav kar sakte ho aisi pareshani se, kaise apne business ko wapas market mein la sakte ho, kaise loss ko recover kar sakte ho, aur kaise apni image dobara build up kar sakte ho. Time zaroor lagega yeh sab karne mein, sochne mein, par ek din hoga zaroor.

Business wale kabhi give up nahi karte. Fail hona journey ka ek part hota hai, lekin khud ko failure samajhna sabse bada loss hota hai humara. Aap ne agar ek koshish kari thi toh usey khatam mat karo. Business mein bahut si situations aisi aati hain jab hum stuck ho jaate hain, humein samajh nahi aata ki hum kya karein is situation se nikalne ke liye, kaise deal karein is sab se.

Apne bhagwaan se pray karo, apne karm sahi karo, kyunki karmon ka bahut bada role hota hai humare business ki journey mein. Karm har cheez mein humare peeche-peeche aate hain, humari zindagi ki har cheez ko affect karte hain. Galat karm karne wale shaqs ke saath zindagi mein kayi baar galat hota hai, alag-alag roop mein hota hai. Jo insaan karm achhe karta hai, usey bhagwan khud raasta dikhata hai aur manzil tak lekar jaata hai.

Aapki apni intelligence aur skills toh hote hi hain, lekin aapke karm bhi bahut bada role play karte hain aapke successful hone aur us success ko jeene mein. Ek mehnati shaqs unchai par jaa kar usey chhu leta hai lekin us unchai par bane rehna sabse bada challenge hota hai.

Aur karmon mein ek sabse bada karm apne maa-baap ki izzat aur pyaar karna hota hai. Aise bahut se log hote hain jo apne maa-baap ko zyada respect nahi karte, unhein zyada pyaar nahi karte. Maa-baap jaise bhi hain, aapka farz hai humesha unki respect karna, na ki sirf peechhe, balki unke saamne bhi.

Jo shaqs apne maa-baap ki izzat karta hai, woh zindagi mein kamyaab zaroor hota hai, aur jo nahi karte, woh bhale hi kitni bhi mehnat kyun na kar lein zindagi mein, woh kabhi na kabhi chot khaate hi hain. Kabhi yeh mat socho ki mere maa-baap ne mere liye kiya hi kya hai, unhone aapko paida kiya, wahi kaafi hai.

Agar aapki saari koshishon ke baad bhi aap apne business ko badha nahi pa rahe ho toh kisi aur cheez mein dimaag lagao. Zindagi mein loss hona koi myth nahi hota, ek sach hota hai, aur humein is sach ko accept karna chahiye jab humari koshishon ke baad bhi humein nuksaan ho jaaye.

Aur aisa bhi zaroori nahi ki agar ek business shuru kiya hai toh woh successful hoga hi hoga. Kayi baar ek business shuru karne se pehle jitna amazing lagta hai, woh baad mein utna hi complicated ho jaata hai.

Agar business mein downfall aya hai toh, mehnat karke usey wapas upar lekar jao. Kayi baar hum purani techniques ya purani technology ya purane ideas ki wajah se fail ho jaate hain, aur humein loss ho jaata hai. Kisi bhi business ko waqt ke saath, technology ke saath, upgrade karna bahut zaroori hai. Jo market mein demand hai, ya jo demand ho sakti hai aane wale samay mein, us cheez ke hisaab se humein market mein apne product ya service ko introduce karna chahiye aur unme changes karte rehna chahiye.

Loss hona aur usey failure maan kar give up kar dena aapko kabhi ek achha aur successful businessman nahi bana payega. Failure ko ek challenge ki tarah accept karna seekho aur khud se promise karo ki aap apne aapko fir banaoge, chahein duniya hasey, mazaak udaye ya kuch bhi kare, apne aap ko dobara uthana hai aur itni mehnat karni hai ki jo aaj aap ke mu par has rahe hain ya aapko loser samajh rahe hain ya underestimate kar rahe hain, unke mu par ek tamacha pade aapki kamyabi ka.

Aapka dedication, aapka hard work aur aap ka mindset hi aapko ek successful insaan banata hai. Phir chahe woh job ho ya business, give up karna, haar manna, aapki dictionary mein nahi hona chahiye.

Life mein jo bhi problems aati hain, hum unse ladte hain aur tab tak ladte hain jab tak hum un problems ko jad se khatam na kar dein, na ki hum problems se darr ke bhaag jaate hain. Usi tarah agar business mein bhi problems aayi hain toh koi baat nahi, inse darna nahi hai, inhein face karna hai aur khatam karna hai, ek aur koshish ke saath.

Agar naubat ek business ko band karne ki aa gayi hai kyunki, aapki ya to calculations galat thi, ya aap se kuch galtiyan aisi ho gayi jinki wajah se ab aapko wakayi mein ye business band hi karna padega, toh sabr karo. Pehle toh koshish karo ki aisa na ho, koi tareeka nikaalne ki koshish karo, bas kaise bhi kar ke survival ho jaye aapke business ka. Agar milta hai toh thik, aur agar nahi milta toh koi baat nahi, us business ko band hone do aur kisi aur cheez ki taraf dhyaan lagana shuru karo.

Malum hai itna asaan nahi hota aisi situations se deal karna, lekin insaan himmat khud ko deta hai aur khud ko apni problems se bahar nikalta hai. Aapko bhi sahara dhundne ki zaroorat nahi hai. Agar gir gaye ho toh gire thodi rahogey, ya agar race mein haar gaye ho toh zindagi thodi khatam ho gayi. Dobara banao khud ko, firse shuruwaat karo, same business ki nahi toh kisi aur business ki hi shuruwaat karo, par haar mat maano.

Haar maan kar ghar par mat baith jao. Khud ko loser mat samjho, aap jahan tak pahuche the, wahan tak pahuch paana bhi bahut logon ka sapna hota hai. Give up karne wale loser hote hain, na ki woh jinke andar itna jazba abhi bhi hota hai ki woh phir se shuruwaat karenge.

Thoda waqt lo is sab ko apply karne ka, kyunki zaahir si baat hai, waqt lagega, par sab sahi ho jayega aur sahi khud nahi hoga toh usko karna padega. Yeh thaan lo aur apne zehen mein baitha lo.

Career se judi har pareshani zaahir si baat hai dil aur dimaag par bahut gehra asar karti hai, kyunki humari life usi ke aas paas ghoom rahi hoti hai. Hum kitne successful logon ko dekhte hain aur inspire hote hain unke jaisa banne ke liye, unse behtar banne ke liye, aur hum usi safar par nikal padte hain bahut zyada motivated aur confident ho kar.

Par aksar hum yeh bhul jaate hain ki koi bhi success yuhin nahi milti, uske peechhe ka struggle bhi samajhna zaroori hai. Us ek success ke peechhe kitni baar ek shaqs fail hota hai, hum us cheez ko nazarandaaz kar dete hain. Hum jitna kamyabi ke liye prepare hote hain, humein nakamyabi aur failure ke liye bhi prepare hona chahiye, us safar mein aane wale har challenge ke liye prepare hona chahiye, kyunki agar hum un sab cheezon ke liye prepare nahi hue toh humara manzil tak pahuchna mushkil ho jayega.

Chahe koi kitna hi hoshiyaar kyun na ho, galtiyan sab se hoti hain, situations har kisi ki badalti hain, bas sawaal hai toh yeh ki aap apni galti se kya seekhe hain? Agar aap galtiyon ko negatively logey, situations ko negatively logey toh na aap unse kuch seekhogey aur na hi aap un situations se bahar nikal sakogey.

Chahe job ho ya business, har field mein, har kaam mein mehnat hoti hai aur kisi bhi cheez mein grow karna itna asaan nahi hota. Sab kuch hota chala jaaye toh kayi baar kismat beech mein aa jaati hai. Lekin kismat bhi banane se banti hai, agar aap ne thaan liya kisi cheez ko haasil karne ke liye, toh koi taakat aapko nahi rok payegi, bas shart yahi hogi ki aapko give up nahi karna, chahe kitni hi baar fail kyun na ho jao. GIVE UP NAHI KARNA HAI!

Zyada overthinking mat karo career ko lekar aur mehnat karne mein jut jao, chahe gir-gir ke aage badho, lekin na ruko aur na hi peechhe mud kar dekho. Khud ko kaabil banane mein jut jao—jitna zyada experience gain karogey, utna hi asaan ho jayega aage ka safar. Isliye sochna band karo aur karna shuru karo, waqt bahut keemti hai, iski kadr karo. Kal jahan dekhte ho khudko pahuchte hue, jis muqaam ke din raat sapne dekhte ho, unhein sach karne koi aur nahi aayega, aap hi unhein sach karoge, aur zaroor karoge.

Khud se promise karo ki aap give up nahi karoge, chahe badi se badi problem kyun na aa jaye life mein, aap thande dimaag se sochogey aur tareeka dhundogey ussey bahar nikalne ka, lekin AAP GIVE UP NAHI KAROGEY!

Har successful insaan ka yahi attitude hota hai ki woh kabhi give up nahi karta, chahe kitni hi baar fail kyun na ho jaaye. Aur fail hone ke baad jab success milti hai na toh humein us success ki kadr bhi bahut zyada hoti hai. Isliye, aaj se sochna band aur mehnat shuru.

Career se judi lag-bhag har problem ke baare mein discuss kiya hai, baaki bahut hongi abhi bhi, lekin aapko ab samajh aa gaya hai ki jab problems aati hain career mein, toh unhein kis attitude ke saath deal karna hai, kaise unko face karna hai aur kaise un problems ko thik karna hai.