Minf F**ked 4

CHAPTER 3

Family Se Judi Overthinking

Humara sabse pehla rishta humari family se hota hai. Humari family jisme hum apne maa, baap, bhai, behen, etc. ko ginte hain. Humari family mein aapas mein hum bahut pyaar se rehte hain, lekin jahan bahut zyada pyaar hota hai, wahan ladaiyan bhi hoti hain, galat fehmiyan bhi hoti hain. Humari family se humari bahut si problems connected rehti hain, phir woh chahe emotional ho, financial ho, ya aapas mein bond ki ho, aisi kayi baatein hoti hain jinki wajah se hum kahin na kahin overthinking karna shuru kar dete hain.

Aagey hum aisi kuch situations ki baat karenge jo ki bahut zyada common hain. Hum sabse zyada overthinking inhi situations mein karte hain. Toh dhyaan se padhiye ek-ek baat. Unhe samjhein, aur implement karne ki puri koshish kariye, taaki aisi situations se bahar aa sako jitni jaldi ho sake.

Padhai Ko Lekar Overthinking

Sab pareshaniyon mein se ek sabse aam pareshani hoti hai padhai ki. Phir woh chahe humare academics score ho ya future ko lekar ho. Humare parents humein kaafi pressurize karte hain achhe marks laane ke liye, standard mein first aane ke liye, par woh yeh nahi samajh paate hain ki har bachche mein same capabilities nahi hoti, sabki kabiliyat alag hoti hai, kisi bachche ka dimaag kisi cheez mein tez hai, toh kisi ka kisi aur cheez mein. Yahan har bachcha first nahi aa sakta.

Agar bachcha first nahi aata toh woh darate hain, dhamkate hain, maarte hain, jiski wajah se ek student tension mein aa jaata hai aur overthinking karne lagta hai, aur us overthinking ki wajah se padhai mein dhyaan nahi laga paata.

Padhai zaroori hai—aisa nahi hai ki bina padhe-likhe sab kuch haasil ho jayega. Padhai likhai zaroori hai, score karna bhi zaroori hai aur apna 100 per cent dena bhi zaroori hai. Is baat ki chinta mat karo ki first nahi aa paaye toh maar padegi, ya fail ho gaye toh maar padegi. Apne dimaag ko shaant kar ke padhai pe dhyaan lagao, toh apne numbers ko pichli baar se behtar kar sakoge, lekin agar isi cheez pe overthinking karte reh gaye to upar jaane ki bajaye neeche reh jaogey.

Overthinking mat karo apne academics ke score ko lekar, ya results ko lekar. Apne dimaag ko shaant kar ke dhyaan lagao padhai mein. Jis waqt padhai kar rahe ho, us waqt kisi cheez ke baare mein mat socho, na future ke baare mein, na score ke baare mein, na relationships ke baare mein, kisi tarah ka self doubt karne ki zaroorat nahi hai. Parents kuch bolein toh unhein samjha dena ki aapne apna 100 per cent diya hai, aur is race mein sab first nahi aa sakte, aur zaroori nahi hai first aane wala student sabse zyada hoshiyar hi ho.

Sirf kaabil banne pe dhyaan lagao, kamyab banne pe nahi. Jitni kam umr mein apni kabiliyat pehchaan loge, utni zyada unchi udaan bharne ke kaabil ho jaogey. Agar kisi subject ko padh rahe ho toh usey sirf pass hone ke liye mat padho, usey ratto bhi mat taaki sab yaad reh jaye. Usey samjho, ussey jo knowledge gain kar sakte ho woh gain karo. Bhale hi scores itne achche na ho, par aapki knowledge zaroor badhegi. Jitni zyada knowledge gain karogey tarah tarah ki cheezon ko lekar, utne zyada hoshiyar banoge. 100/100 toh ratt ke bhi aa jayenge, lekin, 100/100 wali knowledge ratt ke kabhi nahi aayegi.

Agar padhai par focus karne mein dikkat ho rahi hai, toh aagey likhe hue kuch zaroori points padh lo, aur waqt lekar inhein amal karne ki koshish karo, yeh bahut madadgaar sabit hongey aur aap padhai par focus bhi kar sakoge.

Sabse pehle, agar ghar mein padhai kar rahe ho toh padhai ke liye ek aisi jagah dekho jahan aapko koi disturb na kar sake, jahan chair aur table rakhe ho aur aap unpar baithke har roz dhyaan laga kar shanti mein padh sako.

Let kar padhai mat karo. Let kar padhai kabhi nahi ki ja sakti hai, hamesha chair par baith kar hi woh kaam ho pata hai jis par focus karne ki zaroorat padti hai. Agar aap let kar padhenge toh aapki body rest karne wali situation mein aa jayegi aur aap padhai karne ki jagah kharrate maar ke sona shuru kar doge.

Apne dimag mein ek goal set karo ki aapko kitne samay mein kya haasil karna hai. Bina goal ke padhai karne se aap kabhi kisi bhi subject ko samay par finish nahi kar sakte, isliye ek goal set karna bahut zaroori hai. Goals set karne ke baad unhein likh lo kahin aur ek date set kar do ki kaunsa goal kitne din mein achieve karna hai. Issey aap aur bhi zyada dhyaan se kaam kar sakoge.

Ek strict schedule hona bahut zaroori hai. Agar aap samay ka dhyaan rakhte hue padhai nahi karoge, toh aap kabhi bhi achche se padhai nahi kar payenge. Apne aapko prepare kariye us schedule ke according aur samjhaiye khud ko ki jis waqt padhai karne baithoge, us waqt na kisi se baat karoge, na kisi ko sunoge aur na phone use karoge agar zaroori nahi hai toh!

Yeh point unke liye jo pyaar aur relationships ki wajah se focus nahi kar paate hain. Dekho, apne partner ko yeh cheez clear kar do ki jab padhai karoge, toh bilkul bhi disturb na karein woh, aur na aap unse baat karoge apni taraf se, jab tak bahut zaroori na ho. Aur agar koi relationship mein bahut dikkatein chal rahi hain aur aapka exam time hai, toh aap apni relationship se break le sakte hain kuch samay ke liye, taki aap araam se focus kar sakein padhai par.

Lagatar padhai karne ke baare mein mat socho, beech beech mein breaks lene bhi zaroori hote hain, jaise agar 45 minutes lagatar padhai kar li, phir 5 minutes ka break lekar phir continue karo. Aur proper timer ke saath aisa karo, issey aap ka focus aur bhi zyada strong ho jayega.

Overthinking karne ki jagah solutions dhundna shuru kar do. Agar sirf problem ke baare mein sochte rahoge toh solution kabhi nahi dhund paaoge. Logon ki pareshani hi yahi hai ki woh sirf problems ke baare mein sochte hain. Agar hum jitna dimag problems ke upar kharch kar rahe hain, utna dimag solutions pe kharch karein, toh zaroor humari problem solve ho jayegi aur hum ek baar phir tension free ho sakenge.

Family Members Ke Beech Pareshaniyan

Family ke beech hone wali pareshaniyon ki seema yahan tak nahi hai. Humari family mein bahut alag alag tarah ki pareshaaniyan ho jaati hain, jo seedhe humare mind pe attack karti hain, jiski wajah se hum bahut sochna shuru kar dete hain. Phir woh chahe family ke kisi member se aapsi nok-jhok ho ya alag tarah ke ladai-jhagde.

Aksar agar humara kisi se jhagda ho jaata hai ghar mein toh hum bahut sochne lagte hain, chahe kisi ne bhi galti ki ho, aapne ya unhone. Jab aap karte ho galat toh kayi baar aapko mehsoos ho jaata hai ki aapne kuch galat kiya hai, toh kayi baar aapko yeh mehsoos nahi ho paata, aur kayi baar toh samne wale ke galat karne pe sochne lagte ho ki unhone aisa kyun kiya humare saath.

Koi baat boli toh kyun boli, kuch kiya hai toh kyun kiya hai, baat chahe kuch bhi ho, hum apne dimag ko shaant karne mein nakamyab ho jaate hain aur soch soch ke apne sar mein dard kar lete hain.

Jab bhi ghar mein kisi se jhagda ho jaye, hamesha ye socha karo ki kahin galti aap se toh nahi hui hai. Agar aap kuch galat kar rahe ho toh bina soche-samjhe maafi maangne chale jao, apno ke aage apni hi galti par jhukne se koi insaan chota ya bada nahi ho jaata.

Zindagi mein ek baat hamesha yaad rakhna—agar aapko yeh ehsaas ho jaye ki aap galat ho kisi situation mein, ya aapne kuch galat kiya hai, toh kabhi bhi maafi mangne se peeche mat hatna, us waqt aapka ego beech mein nahi aana chahiye. Kyunki insaan ka ego ek din usi ka dushman ban jaata hai, rishte bante kam hain aur toot zyada jaate hain ego mein, aur achche-bhale rishte ka tootna koi achchi baat nahi maani jaati. In phool se rishton ki kadr karna seekho.

Agar galat koi aur hai toh us shaqs ko mauka do ki woh aap se aake maafi maang sakein, par iske liye bhi overthinking karne ki zarurat nahi hai. Unhein jab ehsaas ho jayega woh maafi maang lenge, aur agar wo ghar ke bade hain aur baat koi choti-moti hai, toh aap us relation mein gap mat lekar aao aur unse is baare mein baat zaroor karo.

Jab tak aap dono ke beech mein kisi bhi tarah ka communication nahi hoga, tab tak aap sochte rahenge us baare mein, aur sochte-sochte apne dil aur dimag par ek bojh bana lenge. Aur jab hum kisi ke baare mein gusse mein ya ladai ke baad sochna shuru karte hain toh uske baare mein positive kam negative zyada sochte hain.

Kabhi kabhi sirf baat karne se badi se badi ladaiyon ke solution nikal aate hain, isliye ek mauka zaroor dena chahiye khud ko aur doosre insaan ko bhi. Agar woh aaye hain toh unki baat suniye, aur agar aap ja rahe hain toh zaroor baat kariye, aapke ashaant mann ko shanti milegi.

Family Mein Financial Problems Aana

Agar aapki family mein kisi bhi tarah ke financial issues chal rahe hain, toh aap is baare mein overthinking bahut karte honge. Financial issues do tarah ke hote hain—ya toh woh jo shuru se hi rehte hain, ya woh jo achanak kisi haadse ki wajah se ho jaate hain. Chahe woh lambe arse se chale aa rahe hain, ya woh achanak hue hain, unka asar bahut gehra hota hai ghar ke sabhi members ke upar. Parents ho ya unke bachche, puri family ko hi suffer karna padta hai is cheez se. Agar parents hote hain toh woh ye sochte rehte hain ki kaise wo finances ki dikkat ko thik karein aur apne bachchon ko achcha present aur future de payein, unki needs puri kar payein. Aur bachche ye sochte hain ki hum kaise apne parents ko financially support kar sakte hain, aur kaise hum apni zaroorat aur shauk pure kar sakein.

Financial problems humare mind ko bahut buri tarah se attack karti hain aur humein bahut gehri soch mein le doobti hain ki hum kaise issey bahar niklein. Dekhiye, financial problems kam samay mein thik nahi hoti, unko thik hone mein waqt lagta hai.

Aapka pareshan hona laazmi hai, lekin dhyaan rakhna is cheez ka ki jab tak mentally fit rahoge, tab tak har problem ke solution der saver nikaal hi loge. Lekin agar mentally unfit ho gaye, dimaag pe gehra asar pad gaya is cheez ka toh aapki problem ka koi solution nahi niklega aur suffering badhti chali jayegi.

Agar aap is waqt padhai kar rahe ho, school ya college mein ho, toh aap padhai pe dhyaan do, khaas kar tab jab aap school mein ho. Aapke parents dheere dheere kar ke track par le aayenge is problem ko.

Agar aap college mein ho toh aap phir bhi kuch part-time job karke ya online kisi tarah se income source generate kar sakte hain, zamana kaafi aage badh chuka hai, bahut kam umr se hi bachche online paise kamana shuru kar dete hain. Agar aap manage kar sakte hain toh zaroor kariye, par is cheez ko lekar zyada overthinking mat kariye.

Agar aap aisi situation mein hain jahan aap kaabil ho kar bhi income generate nahi kar pa rahe hain, toh bhi is cheez ko samjhiye ki galti kahan ho rahi hai, agar kisi tarah ki job dhundne mein dikkat aa rahi hai ki job nahi mil rahi, toh aapko patience rakhne ki zaroorat hai. Job na hi itni jaldi milti hai aur na hi itni asaani se lagti hai. Mehnat karni padti hai, patience rakhna padta hai. Waqt zaroor lag sakta hai, 2-4 mahine ya ussey bhi zyada, par is problem ka solution nikal hi aayega.

Paise kamana bahut zaroori hota hai, duniya jahaan ki zarooratein hoti hain humari jo hum paison se hi puri kar sakte hain, par samajhne ki baat yeh hai ki agar mentally fit nahi hoge to paise kamane mein bhi problems aayengi. Isliye apne aap ko mentally fit rakhna bahut zaroori hai. Problem ka solution toh seconds mein mil jayega, par is problem ko solve hone mein time lag sakta hai, jo time aapko apne aap ko, apni zindagi ko dena hoga.

Agar aapke paas filhal koi talent nahi hai aur aap nahi samajh pa rahe ki aap kaise income generate kar sakte hain to aise mein sirf aur sirf apni padhai par focus karna chahiye. Achchi padhai karogey toh job bhi achchi lagegi aur financial problems bhi solve kar sakoge family ki.

Agar aap apni family ko support nahi bhi kar pa rahe ho kisi bhi wajah se, toh bhi yeh samajhne ki bahut zyada zaroorat hai aapko ki har cheez jo hum chahe, jab chahe, ya jis cheez ke peeche hum bhaagein, woh tab hi mil jaye, woh sab kuch tab hi ho jaye, aisa zaroori nahi. Kuch cheezon ka ek waqt hota hai, zindagi mein har cheez ki ek timing hoti hai, zabardasti karne se ya un cheezon ke na hone par overthinking karne se bhi koi solution nahi nikalta.

Aise mein insaan galat raaste chunne lagta hai. Paise kamane ke galat raaste ya asaan raaste mat chuno, izzat se kamana, jab waqt aaye tab kamana, aaj jo zaroori hai, wahi karo. In baaton ko mehez padhna nahi hai, inhein samajh ke dheere dheere in par amal bhi karna hai, tabhi zindagi ko khushi-khushi jee sakoge.

Family Members Ke Reactions

Yeh toh raha financial issues ke peeche overthinking karna. Kayi baar hum is cheez par bhi sochna shuru kar dete hain ki humare family members ke reactions kaise honge. Jaise aksar hum se kuch galat ho jaata hai, ya kisi tarah ka koi nuksaan ho jaata hai, ya hum kuch batana chahte hain hum apni family ko toh hum unse discuss karne se ghabrate hain.

Humein lagta hai ki agar hum is cheez ko apni family se discuss karenge toh woh overreact karenge ya humein samajh mein nahi aata ki woh kaisa react karenge, aur hum is cheez ko lekar kaafi zyada sochne lagte hain, or woh tension humari mental peace ko chheen leti hai.

Chahe kuch bhi hua ho, aap jis insaan se share karne se darr rahe hain, aap himmat karke uske paas jaiye, ya usey message ya call kariye, aur ussey kahiye ki, ‘Mujhe aap se kuch zaroori baat karni hai.’

Jab woh aap ke saath akele mein ho aur aapko sunne ke liye ready ho, toh aap unse share karne se pehle apni puri situation samjhaiye ki aap kyun chhupa rahe the, kyun aap bata nahi paaye, kyun aapko darr lag raha tha batane mein. Share karne mein jab hum apne na batane ki wajah kisi ke saath share karte hain, toh wo shaqs thoda calm down ho jaata hai, usey ye mehsoos zaroor hota hai ki uske darr se uska apna ussey khulne mein darr raha hai, apni cheezein batane mein darr raha hai aur cheezein chhupa raha hai.

Aksar yeh feeling saamne wale shaqs ke mann ko shaant kar deti hai, woh shaqs aapki puri baat sun paata hai aur bahut si baar uska reaction bhi theek ho jaata hai. Yeh cheez bahut baar work karti hai, isliye isko aazma ke dekhna zaroor chahiye. Mujhe pata hai, bahut himmat chahiye hoti hai is sab mein, par dekho, himmat karna zaroori hai. Jab tak himmat nahi karogey, tab tak cheezein asaan nahi hongi, humesha mushkil lagti rahengi aur suljhengi bhi nahi.

Agar woh aapko daantein, toh daant kha lo, kabhi bhi unki daant se daro mat kyunki daant khaane se aapke mann mein ek darr baith jayega us galti ko kabhi na dauhrane ka. Daant khaane se hum bhatakte nahi, kuch daant zindagi ke sabak ban jaati hain, isliye daant khaane se mat daro. Kaan kheech kar jo gyaan milta hai, woh humesha yaad rehta hai.

Agar kuch galat hua hai toh uske anjaam ka bhi saamna karna seekho, warna yeh ehsaas nahi hoga ki jo hua tha woh kitna galat tha. Aksar yahi hota hai, hum galtiyan karte toh hain, aur us waqt seekh bhi lete hain, par kayi baar hum wahi galtiyan dobara dauhrate hain kyunki humein yeh ehsaas nahi ho paata ki wo galti kitni zyada badi thi.

Galti karne ke baad se kisi ke reaction tak ka jo safar hota hai, woh hota toh bahut mushkil or overthinking bhara hai, par maze ki baat yeh hai ki yeh safar kam kiya ja sakta hai, bas humare darr ki wajah se yeh safar lamba hota chala jaata hai aur hum fass ke reh jaate hain.

Sach bata dena, apni galtiyon ko na chhupana, yeh kuch aisi aadatein hain jo insaan ko jitni zyada jaldi aa jayein utna achcha hai. In aadaton ki wajah se humara mann bahut shaant rehta hai. Humare dimaag ki shaanti bahut zaroori hai. Jab bhi hum disturbed hote hain, hum ya to galtiyon pe galtiyan karte chale jaate hain, ya overthinking karne lagte hain.

Parents Ka Attention Na Milna

Family problems mein ek problem yeh bhi hoti hai, parents ka attention na milne ki, unse pyaar, respect na milne ki, unse importance na milna. Agar aapke parents ne bachpan se hi aapko kabhi woh pyaar nahi diya jo aapne aur bachho ko milta dekha hai, jo aapne padha hai, suna hai, dekha hai, uske badle mein aapko woh sab kuch mila jo bahut galat aur berehmi bhara tha, toh aapki soch par, aapke mann par, aur aapke dimaag par is cheez ka bahut gehra asar hua hoga.

Uski wajah yahi hai ki humne bachpan se hi yeh cheez suni hai, padhi hai, aur apne ghar ke alawa bahut se gharo mein dekhi hai ki, bachchon ko maa-baap se bahut pyaar milta hai, itna pyaar milta hai, itni achchi seekh milti hai ki, woh apne maa-baap mein hi bhagwan ka roop dhoond lete hain, par kya sabke maa-baap bhagwan ka roop hote hain?

Nahi, sabke nahi hote, kuch ke maa-baap jaan ke pyaase hote hain apne hi bachchon ki, unhein koste rehte hain, unko lekar pachhtate rehte hain ki ye kyun paida ho gaya, iske paida hote hi maar dena chahiye tha, apne bachchon ko bojh jaisa mehsoos karate hain kuch parents. Is sab ka bahut gehra asar padta hai bachchon ki parvarish par, unki soch hi kuch aur ho jaati hai, unke liye pyaar ki tadap aisi badhti hai ki, woh bhatake reh jaate hain pyaar ki talaash mein.

Agar aap ke saath bhi yahi situation hai jahan aapke parents aapko pyaar nahi karte, toh ab aisa toh nahi ho sakta ki aap kuch karo aur woh aap se pyaar karna shuru kar dein. Aapne bachpan se koshishein ki hongi ki aap unke dil mein apne liye jagah bana sako, unhein ehsaas dila sako ki aapko bhi unke pyaar ki zaroorat hai.

Par uske baad bhi woh kabhi yeh nahi samajh paye, aur woh waise ke waise hi hain, toh aise mein bas aap yeh kar sakte ho ki khud ko samjhao, maa-baap se pyaar milna shayad aapki kismat mein nahi tha. Par aap is cheez ko bahut achche se samjha sakte hain khud ko ki aap jab ek parent banenge tab aap apne bachche ko maa-baap ka pura pyaar denge, us pyaar mein koi kami nahi chhodenge.

Filhaal, aapka maqsad sirf itna hi hona chahiye ki aapko achchi padhai karni hai, apne aapko kaabil banana hai, aur is ghar se door apni nayi zindagi ki shuruwaat karni hai. Aapki life ka sabse bada goal yahi hona chahiye taaki aap khush reh sakein aur apne se jude logon ko bhi khush rakh sakein.

Toh kya hua agar aapko pyaar nahi mila, aapko jo nahi mila wo dene ke kaabil aap hote hain, maa-baap ka pyaar nahi mila, lekin, aapki zindagi mein aap achche parent baniye, taaki aapke bachche aisa feel na karein ki unhein bhi maa-baap ka pyaar nahi mila.

Jo humari kismat mein nahi usey kosne se kuch fayda nahi, usey zabardasti paa bhi nahi sakte aur zabardasti haasil kari hui cheezein bhi nakli hi hoti hai, unme bilkul bhi sachchai nahi hoti. Isliye natural cheezon par vishwas rakho, naturally kuch aa raha hai toh aane do, aur jo kabhi naturally nahi aa saka, usey zabardasti haasil karne ki koshish mat karo.

Bhed bhaav bhi bahut hota hai bachchon mein, jo bachchon ko mehsoos ho jaata hai. Jaise ek family mein do bachche hain, ek ladka aur ek ladki, aur aisi kuch baatein hoti hain jin baaton par ladkon ko allow kar diya jaata hai aur ladkiyon ko restrict kiya jaata hai. Iski wajah se ladkiyon ke dil mein yeh baatein bachpan se hi chubhne lagti hain ki duniya toh bhed-bhaav karti hi hai, apne ghar mein bhi ye sab ho raha hai, jiski wajah se wo ladkiyan kaafi overthinking karne lagti hain.

Ab is cheez pe overthinking karne se kuch solution nahi niklega. Yeh hum se pichli generation ki soch thi, kyunki yahi chala aa raha tha. Equality ki baat toh humari generation se uthni shuru hui hai, aur agar humari generation ne is cheez ka ehsaas kiya hai toh zaroor humari aane wali generation is cheez ko bahut kam face karegi.

Jaisa ki maine pehle bhi kaha, short-term solution nahi hota har cheez ka, kuch solutions long term hote hain, aur saalon mein amal ho paate hain. Isliye in sab cheezon pe overthinking nahi karni chahiye.

Family problems ki toh koi limit nahi hoti, par humari soch ki ek limit honi chahiye, agar hum us par limit nahi lagayenge toh humari life mein problems humein unlimited lagne lagengi.

Kuch problems toh normal hoti hain family ke beech, lekin kuch problems kaafi badi hoti hain jinka short-term solution nahi hota hai, woh long term hi hoti hain. Isliye family se related problems ko bahut hadd tak solve kiya ja sakta hai. Jinko solve kiya ja sakta hai, unhein solve karo aur overthinking karna band karo. Aur jinka koi solution nahi, un problems ke baare mein soch-soch kar apna waqt zaya mat karo.

Apne goals pe dhyaan do, apni life ko enjoy karne ke tareeke banao, logon se baat-cheet karo, achche aur positive logon ke saath raho, negative aur bure logon ke saath nahi, family problems dimaag par asar kam karne lagengi.

Main yeh kabhi nahi kehta ki doosron par depend karna shuru karo, ghar ke bahar bhi itni achchai nahi hai. Lekin apne aap ko distract karne ke liye aap thoda bahut socially apne aap ko involve kar sakte ho, apne doston ke saath waqt bita ke, apne kareebi logon se baat karke, apni problems share karke, bas badle mein unse kuch expect mat karna. Dekhna, mann halka bhi hoga aur zarurat se zyada sochoge bhi nahi.

Family Members Ke Health Issues Hona

Jab bhi humare parents ke saath health issues hote hain toh hum bahut pareshaan ho jaate hain. Maa, baap, bhai, behen ya koi bhi important family member bahut aham hote hain humari zindagi mein, aur jab in khaas logon ke saath koi bhi pareshaani ho jaaye, koi bhi takleef ho jaaye, toh hum bahut zyada pareshaan ho jaate hain ki kahin kuch galat na ho jaaye, kisi ki tabiyat zyada na bigad jaaye, ya koi bimaari zyada na badh jaaye.

Is tarah ke khayaal aana bahut laazmi hota hai, uski wajah hai humara humari family members ke saath pyaar aur attachment. Bhale hi humari kisi ke saath achchi banti ho ya nahi, par phir bhi, jab baat apne family members ki health ki aati hai toh humara mann bahut pareshaan ho jaata hai, ulte-seedhe khayal aane lagte hain aur chinta hone lagti hai.

Is cheez ki overthinking ko control karne ke liye sabse pehle aapko yeh samajhna hoga ki humare haath mein kuch cheezein hoti hain aur kuch cheezein nahi. Kabhi kabhi humare bas mein hota hai ki hum kisi ki taraf dhyaan de kar uski bimari ya jo bhi pareshani hai us shaqs ko, uska achche se treatment kara kar aur sahi samay par kara kar usey theek kar sakte hain.

Par kabhi kabhi aisa nahi bhi hota hai. Yahan main baat zindagi ya maut ki nahi karunga, balki bas itna kahunga ki humein humari taraf se efforts karne chahiye us shaqs ka khayaal rakhne ke liye jiski tabiyat thik nahi hai. Uska khayal rakho, uski dawaiyon ka khayal rakho, aur uske doctor ke appointments ka khayaal rakho. Aap bas apni taraf se unka pura dhyaan rakho, aur bhagwan se zaroor dua karo unki health ke liye ki jald se jald woh theek ho jayein.

Aapka pareshan hona laazmi hai, par sach kahun toh pareshan hone se takleefein kam nahi hoti. Apne dimaag ko positive rakho aur koshish karo zyada se zyada dhyaan rakhne ki us shaqs ka jisko zarurat hai aapki. Hum apni taraf se koshishein karte rahein, bas yahi ek achchi aur sahi baat hoti hai. Kabhi bhi aisi situations mein panic nahi karna chahiye. Bhagwan se jud kar us insaan ki health ko thik hone ke liye samay dena chahiye aur pray karna chahiye.

Chinta mat karo, der-saver sab theek ho jayega. Agar us shaqs ki umar lambi hai aur agar uski kismat achchi hai, toh zaroor aapka aur uska saath yuhi chalta rahega. Lekin agar uski umar utni nahi hai jitni aap umeed karte hain, toh bhagwan se dua karna uske liye ki woh bas khush rahe, chahe jaha bhi rahe, jaise bhi rahe, bas khush rahe aur shanti mein rahe.

Kisi Family Member Ko Kho Dena

Ek insaan ki zindagi mein agar sabse mushkil koi din hota hai, toh wo shayad us din jab wo kisi apne ko kho deta hai humesha ke liye, chahe woh parents ho ya grandparents, ya fir bhai-behen, ya koi kareebi rishtedar.

Agar kabhi aisa din aa jaaye aapki zindagi mein, jis din aapko yeh pata hai ki aap yeh chehra aakhri baar dekh rahe hain, yeh shareer aakhri baar dekh rahe hain, unse mulaqat aakhri baar kar rahe hain, toh wakayi mein aap toot hi jaate hain.

Kitna waqt lagta hai sirf yahi accept karne mein ki kal tak jo chehra itna khilkhilata tha, itna khush rehta tha, kabhi khafa ho jaata tha, toh kabhi fir maan jaata tha, ab woh chehra dobara kabhi dikhayi nahi dega. Woh awaaz ab kabhi sunayi nahi degi, unki maujudgi kabhi mehsoos nahi ho sakegi. Bahut mushkil ho jaata hai kisi insaan ki maut ka saamna karna, uske shareer ko alvida kehna, khaas kar tab jab aap us shaqs se bahut zyada attached the, bahut zyada kareeb the aur bahut zyada pyaar karte the.

Kisiki tabiyat kaafi arse se kharaab chal rahi ho, tab toh phir bhi ek baar ko ek insaan ko pata hota hai ki ab unke paas zyada samay nahi hai. Lekin kuch haadse toh aise hote hain jinke liye na toh aap kabhi tayyar hote hain aur ho jaane ke baad bhi kayi din, mahine, saal tak us incident ko bhula nahi paate hain. Aur woh haadse jo khaaskar aapki nazron ke saamne hue, ya jin haadson ka aap khud shikaar hue, jisme aap toh bach gaye, lekin woh nahi bach sake.

Overthinking toh ek bahut choti si baat hai—aisi situations ka ek insaan ko aisa sadma lagta hai jissey ubarna uske liye bahut mushkil ho jaata hai. Din-raat us shaqs ki yaadein, baatein, kisse na hi sirf yaad aate hain, balki satane lagte hain, aap jitni zyada koshish karte ho ussey door jaane ki, usey bhulane ki, wo utna zyada yaad aate hain.

Main samajh sakta hoon kisi apne ko khone ka dard, aur samajh sakta hoon ki aap kin halaaton se guzar rahe ho. Bhale hi baat kal ki ho ya ek arsa beet gaya ho, ek insaan ko kaafi waqt lagta hai aisi situations se move on karne mein. Woh chahkar bhi move on nahi kar paata. Jab bhi aap aage badhne ki koshish karte ho, phir wahi sab dimaag mein aane lagta hai aur fass jaate ho isi loop mein.

Ab kuch points ke zariye aapko samjhane ki koshish karunga ki kis tarah aap is situation ke saath deal kar sakte hain, aur khud ko sambhalne ki koshish kar sakte hain:

Express karo

Dekho, sabse pehli aur sabse zyada zaroori agar koi cheez hoti hai toh woh hoti hai ki jo bhi aap ke andar feelings hain, jo bhi baatein hain, jo bhi khayaal aapko aa rahe hain ya aate hain, aapko apne andar nahi rakhne hain.

Apne andar ke jazbaaton ko bahar nikalo aur unhein share karo kisi ke saath. Koi family member, koi dost, koi saathi, koi doctor, koi professional person, ya koi pet, inke saath share karo, aise har waqt nahi, lekin har thode din mein aap apni baatein share kar sakte ho.

Jitna yeh sab aap apne andar rakhogey, in feelings ko apne dil mein daba ke rakhogey, utni takleefein hongi, utna pareshan hogey, utna zyada overthinking karogey. Sabse zyada zaroori yahi hota hai ki aap express karo apni feelings ko.

Agar aapke paas koi bhi nahi hai, koi ek shaqs bhi nahi jiske saath aap share kar sakte ho ya jo aapko sun sakta hai, toh koi baat nahi. Har insaan apne dard ko kisi na kisi roop mein bahar nikaal sakta hai.

Aap kahin likh kar apni feelings ko express kar sakte ho, kisi diary mein, ya phir kisi phone app mein. Agar aap ek artist ho, toh aap apni art ke zariye apne dard ko zaahir kar sakte ho, kisi platform par, ya agar kahin publicly express nahi karna chahte toh personally bhi rakh sakte ho. Lekin aapko zaroorat hai express karne ki khud ko, khud ki feelings ko, unhein jitna chhupaogey, utna dard aur badhega.

Khud ko busy rakho

Ab doosri cheez hai ki apne aap ko khaali mat rakho, kuch na kuch kaam karte raho, agar office jaate ho toh wahan jao, business hai toh wahan jaake baitho aur apne kaam ko aage badhao, ya kisi bhi profession mein ho toh apne kaam ko continue rakho, agar student ho toh apni padhai ko continue karo. Ruko mat, thamo mat. Shuruwaat mein bhale hi kaafi time lage aapko focus karne mein, lekin insaan dheere dheere hi move on karta hai.

Shuruwaat ki kuch koshishein bhale hi nakaam hoti nazar aati hain, lekin jaise-jaise waqt beetta hai, insaan jeena shuru kar hi deta hai, woh focus wapas aane lagta hai. Aur yeh sab aisa nahi hai ki, kisi ki death ke turant baad kar diya. Aap samay lo, aapko pura haq hai samay lene ka, lekin zaroorat se zyada samay mat lena, warna us jagah se bahar nikalne mein kaafi der lag jayegi.

Apne aapko socially involve rakho

Logon se milte raho, chahe mann na kare, lekin har thode samay mein logon se milo, unke saath baitho, unke saath waqt bitao, kuch apni kaho, kuch unki suno, lekin yeh silsila banake rakho. Aap jitna khud ko akela karogey is situation mein, aap utna depressed feel karogey, utna aapko pareshan karenge aap ke thoughts, or overthinking karne lagogey.

Isliye khud ko akela kabhi mat karo, aksar insaan akela khud ko karke bahut door chala jaata hai, aur negative thoughts aane ki wajah se kayi baar galat faisle lene lagta hai, galat steps leta hai, isliye kabhi bhi khud ko akela mat karo, chahe aap ke paas koi ho ya na ho, lekin, aap kisi na kisi ke paas raho.

Suicidal mat ho

Agar aap ko suicidal feelings aa rahi hain to kisi family member, friend, therapist ya suicide helpline ko call karo. Hum aksar zindagi mein jab bhi kisi apne khaas ko khote hain, jisse hum bahut pyaar karte the, bahut attached the, toh hum khud ko maarne ke baare mein sochne lagte hain. Humein aisa lagta hai ki unke bina jeene ka kya fayda, hum imagine hi nahi kar paatey apni zindagi unke bina.

Aisi situation mein kabhi bhi khud ki jaan lene ke baare mein mat socho. Bahut keemti hoti hai zindagi, duniya mein na jaane kitne log jeena chahte hain, lekin jee nahi paate kisi bimari ki wajah se, ya kisi dikkat ki wajah se. Agar aapko bhagwan ne itni keemti zindagi di hai toh ussey pyaar karo, uski kadr karo, aur usey khatam mat karo.

Aapko apne saath saath kayi logon ka dhyaan rakhna hai, kisi apne ke jaane se har insaan tootta hai, aur aapko aise logon ki himmat baandhni hai, apne saath saath aur logon ka bhi khayaal rakhna hai jinhein dukh hai unhein khone ka. Isliye na hi sirf khud ke liye, aapko doosron ke liye bhi jeena hoga. Aur sach kahun toh aapko kuch bhi galat karta dekh us jaane wale ki aatma ko kabhi shanti nahi milegi.

Waqt ko waqt do

Jiski kismat mein tha jaana, woh chala gaya, lekin agar aap jee rahe ho aaj bhi toh isko ek blessing samjho bhagwan ki. Zindagi bhi ek blessing ki tarah hoti hai, yeh baat ussey behtar kaun jaan sakta hai jo zindagi maut se lad raha hai lekin, phir bhi jeena chahta hai. Isliye kadr karo apni zindagi ki.

Accept karo kisi ke chale jaane ko, mushkil bahut hoga, par accept karna hi sabse badi kamyabi haasil karna hota hai, jo hua uspar yakeen karo, khud ko waqt do aise mushkil daur se guzarne ke liye aur yakeen karne ke liye, himmat bandhe rakho, isey tootne mat dena kisi bhi haal mein. Guzarte waqt ke saath saath har zakhm bhar jayega tumhara. Jo aaj namumkin sa lag raha hai, woh ek din mumkin ho jayega.